Deputeti Petrit Vasili ka folur për sulmet që iu bënë sistemeve të sigurisë nga hakerat iranianë dhe publikimin e të dhënave.
I ftuar në “Radar Informativ”, Vasili iu përgjigj deklaratëve të kryeministrit Rama, sipas të cilit të dhënat e publikuara sot nuk ishin të vërteta. Vasili tha se Ramës nuk i duhet besuar kurrë, ndërsa e quajti atë “kryehakerues”
“Edi Ramës nuk i duhet besuar kurrë. Jo se e them unë. Nuk keni për të gjetur kurrë një deklaratë koherente, të vërtetë që i qndron kohës. Kryehakeruesi ka qenë vetë Rama. Ne nuk e kemi harruar historinë e miliona të dhënave që u bënë publike, patronazhistët. Për këto miliona të dhëna nuk u dënua asnjëri. Më tutje rrodhën miliona të dhëna të tjera dhe një gjë është kokëforte. Ata që verifikojnë me përgjegjësi, siç qe Microsoft, thanë se ka një veprimtari që vazhdon prej 14 muajsh dhe pohojnë se 3 vjet më parë ato që duheshin për të bërë sigurinë e plotë kanë lënë porta hyrëse në system”, tha Vasili.
Vasili e ka quajtur të gjithë situatën të qëllimshme, duke thënë se Rama nuk ishte i zoti të ndërtonte një shtet të sigurt.
“Me qëllim. Ndërkohë që këto të dhëna ishin me miliona, ky shkon dhe u bën presion bankave për të përdorur e-albania ndërkohë që sistemi ishte lëmsh. Si mund të kërkonte që bankat ta përdornin? Qëllimi ishte të fuste duart edhe në sistemin banker. Më tutje e keni parë përshkallëzimin edhe në shumë sisteme te tjera të mbyllura, siç ishte TIMS. I gjithë shteti i këtij ra sepse ky nuk ishte i zoti të ndërtonte një shtet të sigurt”, tha Vasili.
Vasili u ndal tek gjuha e përdodur nga Rama, i cili ka deklaruar vazhdimisht se “lufta” me hakerat është fituar dhe ata nuk kanë marrë asnjë të dhënë sensitive.
“Situata ka dalë nga kontrolli sepse po e shkatërrove sistemin nga brenda, nuk e kontrollon dot më. Edi Rama është fajtori kryesor. Ky vazhdon e gënjen pambarimisht, i keni dëgjuar idiotësirat metaforike që përdor. I përdor qëllimisht sepse është i përfshirë”, tha deputeti.
Vasili shtoi se janë shpenzuar miliona euro për sigurinë e sistemeve.
“250 milionë e më shumë janë shpenzuar. Sistemi ka marrë fund që 14 muaj më parë. Sistemi që prej tre vitesh nuk i janë bërë të gjitha updateimet. Të dhënat sensitive kanë dalë sheshit dhe ky është fakt”, tha ai.
