Dy pallate të ndërtuesit Julian (Lul) Morina raportohet se janë sekuestruar këtë të Hënë, pasi janë konstatuar kate pa leje. Shiriti i sekuestros është vendosur tek objektet në ndërtim që ndodhen tek ‘Liqeni i Thatë’, në kryeqytet, ndërsa në zonë ka prezencë efektivësh policie.
Sipas raportimeve mediatike, urdhri për sekuestron vjen pas disa muajsh hetimet nga prokuroria, megjithatë nga organi i akuzës nuk ka ende një konfirmim zyrtar për rastin.
Biznesmeni rezulton të jetë një shkelës i përsëritur i ligjit për sa i përket ndërtimeve pa leje, pavarësisht se deri më tani nuk ka të dhëna të jetë dënuar nga gjykatat.
Ishte pikërisht një objekt i Lul Morinës, me të cilin qeveria nisi aksionin e shumëdebatuar për ndërtimet pa leje.
Disa javë më parë, zëvendësministrja Belinda Balluku njoftoi “konfiskimin” e një godine 9-katëshe tërësisht pa leje e biznesmenit Julian Morina. Sipas vendimit të qeverisë, ndërtimet pa leje të konfiskuara mund të parablihen me çmimin e tregut, ose ti kalojë në pronësi shtetit. Për rastin në fjalë, qeveria nuk ka bërë transparencë se çfarë ka ndodhur.
Në herët, “Boldnews” ka raportuar se si Julian kishte ndërtuar një godinë pa leje në Dhërmi.
