Ish-drejtoresha e Autoritetit Rrugor Shqiptar, Sonila Qato ditën e sotme ka mbërritur në SPAK ku për rreth dy orë dëshmoi për rrugën Kardhiq-Delvinë.
Pasi doli nga godina e SPAK-ut, Qato tha se marrë në pyetje në cilësinë e personit që ka dijeni për rrethanat e hetimit si ish-drejtoreshë e ARRSH, lidhur me procedurat e ndërtimit të aksit Kardhiq-Delvinë. Gjithçka nisi pas kallëzimit të kompanisë Gjoka, e cila pretendon se u përjashtua nga tenderi.
Qato hyri në SPAK i shoqëruar nga avokati i saj Vladimir Meçe. Ish-drejtuesja duhet të japë llogari tani edhe pas raportit të KLSH mbi këtë tender.
“Është një procedurë që ka filluar tre vjet më parë me dorëheqjen time, në të cilën dhashë detaje nga rrethanat e çështjes në dijeninë time. Procedura e kallëzimit është për rrugën Kardhiq-Delvinë. Me sa u njoftova, po hetohet për shkelje të barazisë në tendera. Përderisa prokuroria është duke kryer detyrat e veta proceduriale, unë mendoj se dhe shkaku i dorëheqjes time në 2019 ka qenë pikërisht dhënia e mundësisë Prokurorisë për të dhënë drejtësi dhe për të nxjerrë të vërtetën në pah. Lejojeni Prokurorinë të bëjë detyrën”, tha Sonila Qato pas daljes nga SPAK.
Ajo refuzoi të japë komente dhe detaje të mëtejshme duke shtuar se shkaku i dorëheqjes së saj do të ishte për t’i dhënë mundësinë drejtësisë të bëjë detyrën e saj për të hetuar deri në fund këtë çështje.
