Situata e mijëra azilkërkuesve shqiptarë, që i janë drejtuar Britanisë së Madhe gjatë këtij viti, duke bërë kalimin e rrezikshëm me gomone përmes kanalit të “La Manshit”, është ende e paqartë edhe pse drejtimin e ishullit e ka marrë qeveria e re e udhëhequr nga Liz Truss.
Teksa një javë më parë u përfol për një plan të ri që do të lehtësonte masat në fuqi për emigrantët ilegal, por edhe do të hapte Britaninë për forcën punëtore në profesione ku nevojiten njerëz jo shumë të kualifikuar, duket se nuk mendon kështu Sekretarja e re e Brendshme.
Suella Braverman është zotuar sot se do ta bëjë më të vështirë për migrantët që “pretendojnë” se janë viktima të skllavërisë moderne që të vijnë në Mbretërinë e Bashkuar.
Duke ju referuar në veçanti shqiptarëve, Braveman u shpreh se ata po “abuzojnë” me sistemin dhe pretendojnë të jenë viktima të skllavërisë modern ose gjakëmarrjes për të bërë të mundur qëndrimin në ishull.
Zyrtarët qeveritarë besojnë se rreth 60% e emigrantëve që kalojnë në Kanal çdo ditë tani janë shqiptarë, edhe pse shifrat ndryshojnë vazhdimisht, ndërsa alternativa e Braverman për t’i bërë ballë situatës është reformimi i “Aktit të Skllavërisë Moderne”.
“Kjo do t’i lejojë zyrtarët të largojnë njerëzit jashtë vendit të cilët kanë paguar dhjetëra mijëra paund për privilegjin e të qenit një i ashtuquajtur skllav modern”, ka deklaruar ajo.
Më tej Sekretarja e Brendshme ka shtuar se “ajo që ka ndodhur është se qëllimet dhe struktura e atij legjislacioni janë shtrembëruar plotësisht”.
“Tani ajo që po shohim është se shumica e njerëzve që vijnë këtu nga Shqipëria, rreth 80 për qind e njerëzve që hasin me varka të vogla, pretendojnë se janë viktima të skllavërisë moderne. Kjo është pavarësisht nga fakti se ata mund të kenë paguar dhjetëra mijëra paund për privilegjin e të qenit një i ashtuquajtur skllav modern. Kjo është gjithashtu pavarësisht nga fakti se ata do të kenë kërkuar në mënyrë aktive të vijnë në MB përmes një metode të paligjshme, të paligjshme dhe të rrezikshme. Pra, po abuzohet”, theksoi ajo.
