Ervin Salianji, deputet i PD, foli në A2 CNN për situatën në opozitë teksa vendi po shkon drejt zgjedhjeve lokale të vitit të ardhshëm.
Ai u shpreh se opozita duhet të nisë më parë protestat pasi pakënaqësia te qytetarët është e madhe ndaj qeverisë.
“Përgjegjës për protestat janë ata që e drejtojnë opozitën. Unë bëj pjesën si deputet i PD, por duke mbajtur pozicionin dhe interesat e publikut. Protestat duhet të kishin nisur dhe duhet të mbahen një orë më parë për të shprehur pakënaqësinë e qytetarëve ndaj korrupsionit të qeverisë. Shikoni se çfarë ndodh me çmimet në Shqipëri. Opozita duhet të bëjë bashkë të gjitha grupet e goditura dhe të prijë në protesta shoqërinë shqiptare”, u shpreh Salianji.
– Por sa e bashkuar është sot PD?
“Nuk ka një qëndrim të përbashkët. I gjithë grupi i PD duhet të jetë i koordinuar, të bëjnë përpjekje jo vetëm për t’u ulur, por për të krijuar terrenin e duhur që të ketë më shumë të rinj, njerëz me kontribute në shoqëri për t’i dhënë kredibilitet PD-së. Opozita është para një testi shumë të rëndësishëm që janë zgjedhjet lokale. Çdo votë është shumë e rëndësishme në zgjedhjet lokale”, tha Salianji.
