Prindër dhe fëmijë të kopshtit “Zybeide Hanim” ditën e sotme po mbajnë një protestë përpara Kryeministrisë.
Ata kërkojnë që të anulohet vendimi për mbylljen e këtij kopshti që sipas qeverisë thuhet se vjen si pasojë e kushteve të papërshtatshme higjeno-sanitare.
Prindërit kanë ndjekur edhe seancën gjyqësore të javës së kaluar ku ka qëndruar në fuqi vendimi i Këshillit të Ministrave, ndwrsa sot po protestohet me fëmijët para Kryeministrisë. Prindërit të vendosur të protestojnë sepse e cilësojnë të padrejtë e të paarsyeshëm vendimin. Prindërit kanë dalë me pankarta dhe janë të shoqëruar nga fëmijët 3-6 vjeç që ishin pjesë e këtij kopshti.
“Sot kërkoj që të anulohet vendimi për mbylljen se është i pabazë. Fëmijën e kam mbajtur në shtëpi. Kjo nuk është zgjidhje, pa një arsye, pa paralajmërim. Fëmijës nuk i kemi thënë fare. Që ditën e parë tha se dua të shkoj në kopsht. Është justifikim, nuk ka lidhje fare. Unë kam pasur nipin e madh dhe e di se cfarë kushtesh. Të anulohet vendimi. Nuk e dimë”, u shpreh njëra prej protestuesve.
“Ne kërkojmë anulimin . Kam marrë mamin të më ndihmoj se s’ka kush të ma mbajë. Do lija punën se nuk shoh asnjë kopsht të përshtatshëm për fëmijën tim. Kërkojmë që ministrat ta shikojnë edhe njëherë atë vendim se nuk është i vlefshëm. Kam parë kopshte të tjera private, edhe shtetërore, nuk mund të flasim për kushtet higjieno sanitare atje”– u shpreh një prind.
“Të dal kryeministri dhe të na thotë ku ti çojmë kalamajtë, nuk kemi një vend ku t’i çojmë. Ne duam më të mirën për to. Imë shoqe ka marrë leje dhe rri në shtëpi. Jemi te pashpresë përballë këtij shteti. S’kemi ardhur për politike”- u shpreh një tjetër prind.
Në një prononcim për mediat, një prej prindërve të pranishëm, thotë se argumenti i qeverisë se kopshti u mbyll për shkak të kushteve jo të mira nuk qëndron, pasi institucioni në fjalë ishte ndër më të mirët në Republikën e Shqipërisë. Ai shtoi se këtë të enjte i gjë populli duhet të ishte në protestë për t’i dhënë një mesazh qeverisë në lidhje me vendimet arbitrare që ndërmerr.
“Këtu kemi dal për të thirrje ndaj popullit se kryeministri e dimë si e kemi. Këtu nuk jemi prekur vetëm ne si prindër por është prekur shqiptaria. Është mbyllur kopshti më i mirë. Të dalë media dhe të bëjë një krahasim të kushteve të atij kopsht me kopshtet e tjera në vend. Sot populli duhet të ishte bashkangjitur në këtë protestë. Çdo ditë po bëhet më e vështirë për djalin, çdo ditë kërkon zyshën dhe shokët. Shpresë te qeveria nuk kemi, por kjo protestë ishte për të ndërgjegjësuar popullin se në çfarë pike kemi arritur. Institucioni do ta gjejë të drejtën e vet, ndoshta jo këtu në Shqipëri por jashtë në gjykatat ndërkombëtare, pasi të drejtën e kanë, të paralizuarit jemi ne”, tha prindi.
