Ështe zbardhur dhe dokumentuar atentati i datës 20.04.2022 në Lushnjë, ku mbeti i plagosur me armë zjarri shtetasi Kujtim Meta.
Policia e Lushnjes njofton se autori i krimit është Dorian Shurdhi, 29 vjeç.
Ngjarja ndodhi në orën 16.15 në lagjen “Skënder Libohova”. 44-vjeçari ka qenë duke konsumuar një kafe vetëm, kur autori, i maskuar me me kapuç dhe maskë anti-Covid hyri brenda lokalit dhe qëlloi 8 herë në drejtim të Metës. Dy plumba e kapën në shpinë dhe dy të tjerë në krahun e djathtë. Kujtim Meta, banues në fshatin Savër të Lushnjës, nuk ka precedent të mëparshëm penalë.
Dorian Shurdhi ishte arrestuar edhe në vitin 2015, pasi tentoi të vriste në bashkëpunim, 51-vjeçarin K.B. dhe të birin e tij M.B., 24 vjeç për motive të dobëta.
NJOFTIMI ZYRTAR
Pas një pune të mirëfilltë hetimore, nga Seksioni për Hetimin e Krimeve të Komisariatit të Policisë Lushnjë, në bashkëpunim me Prokurorinë e Rrethit Gjyqësor Lushnjë, është bërë e mundur zbardhja dhe dokumentimi ligjor i ngjarjes së ndodhur më datë 20.04.2022, në lagjen “Skënder Libohova”, Lushnjë, ku mbeti i plagosur me armë zjarri shtetasi K. M., 44 vjeç.
Si rezultat i hetimeve të thelluara dhe provave të grumbulluara në lidhje me këtë ngjarje, u bë identifikimi i autorit të dyshuar, shtetasit D. Sh., 29 vjeç, banues në Lushnjë, i cili u shpall në kërkim.
Për 29-vjeçarin, pas identifikimit nga ana e Policisë, në bashkëpunim me Prokurorinë, bazuar në provat e siguruara, Gjykata e Rrethit Gjyqësor Lushnjë, caktoi masën e sigurisë “Arrest në burg”, në mungesë, për veprat penale “Vrasja me paramendim”, mbetur në tentativë dhe “Mbajtja pa leje e armëve dhe municionit luftarak”.
Vijon puna për kapjen e shtetasit D. Sh. dhe vënien e tij përpara përgjegjësisë penale.
Materialet procedurale i kaluan Prokurorisë, për veprime të mëtejshme.
