Nga Boldnews.al
“Nuk ka ndërtues në Shqipëri që me del para dhe më thotë që një qindarkë e punës së tij është në xhepat e mi. Nuk ka”. Këtë deklaroi prerë kreu i qeverisë, me një zë të dridhur nën një emocion të brendshëm që nuk dihet se ngase i erdhi. Po, kryeministri tha një të vërtetë të madhe dhe arsye se përse ta vishte qëndrimin e tij me “luhatje emocionale” vështirë të kuptohet. Asnjë ndërtues oligark në këtë vend nuk mund të dalë dhe të thotë se kryeministrit apo kryetarit të bashkisë i ka dhënë hise në kullën e madhe, e aq më pak pare korrupsioni nëndorë. Si mund ta thotë kushdo bos ndërtimi ku kishën, xhaminë e teqenë për tu “falur” në shtimin e pasurisë së tij e ka në duar kryeministri si kreu i KKRRT-së dhe kryebashkiaku?
A kafshohet dora që të ushqen? Në botë njihen shumë vrasës të penduar, por numërohen me gishtat e duarve ata biznesmenë që korruptojnën apo drejtues të mafias që kanë rrëfyer mëkatet e tyre me politikanë, për aq kohë sa biznesi ekonomik dhe ai politik rreshqet vaj në një vend ku varfëria, pasiguria dhe emigracioni janë drama që shfaqet përditë.
Nuk ka pasur, nuk ka dhe nuk do të ketë asnjë biznesmen të madh që të tregojë që ka dhënë ryshfet për krerët e politikës me qëllim që ai apo ajo të japë leje ndërtimi në çdo b… vendi për të ngritur grataçelat në zemër të kryeqytetit. E para dhe më kryesorja është se nëse dikush do e bënte një deklaratë të tillë apo një rrëfim që ka dhënë para për të marrë një leje ndërtimi ligji dënon si atë që jep, edhe atë që merr.
Të dyja palët do dilnin të humbura. Biznesmeni do të fundosej, duke parë sesi pasuria e tij e vendosur me lloj e soj marifeti do shkrihej për pak kohë. Po ashtu edhe politikani i korruptuar prej tij do rrezikonte burgun. Po cili biznesmen i mësuar të notojë në llumin e politikës del i pastër nga moçali që krijuan vetë? Në Shqipëri, ai grusht i vogël oligarkësh “mëkatet e korrupsionit”, as në shtratin martesor nuk i rrëfen.
Lëvizja e fundit e kryeministrit Edi Rama se do të sekuestrojë çdo ndërtim pa leje në kulla dhe pallate po i kthehet në boomerang. Së pari Rama as që e mendoi kur mori këtë nismë propagandistike se i gjithë oponioni publik do i kthehej me pyetjen e thjesht: “përse i lejove kullat që të zenë sytë të lartësoheshin pa leje për muaj e vite”?
Përgjigje për këtë nuk ka. Por ajo që duket se e vret më shumë Ramën në këtë nismë të veten, të pamenduar, është fakti se u zbulua qëllimi që oligarkët e ndërtimit jo vetëm nuk po procedohen penalisht nga policia dhe prokuroria, por po amnistohen, duke iu dhënë të drejtën e parablerjes për katet shtesë, në një merifet qeveritar ku të dyja palët dalin të fituara.
Ndërtues oligark që t’i thotë Ramës i korruptuar nuk do të ketë, as sot e as mot. Por ka disa ndërtues që akuzojnë e mallokojnë çdo ditë kryeministrin, policinë dhe drejtësinë se janë të korruptuar. Janë ndërtuesit e çative të shtëpisë së tyre, janë ndërtuesit e avllive, janë ndërtuesit e haurit të bagëtive, janë edhe ndërtuesit e kotecëve të pulave që policia i tërheq zvarrë, u ve prangat në duar dhe u plotëson dosjen për në prokurori. Këta ndërtues janë shumë.
Mbi 4000 të tillë përfunduan dyerve të drejtësisë si kriminelë duke i nëpërkëmbur çdo lloj e sorrollop inspektori INUK-u e INUV-i dhe policie. Të gjithë këta ndërtues bërtasin me të madhe: Qeveri, polici dhe drejtësi e korruptuar!
