Në mbledhjen e sotme të Këshillit Kombëtar të Partisë Demokratike, kryetari Sali Berisha nuk ka nguruar të flasë për çështjen e financimeve ruse që parardhësi i tij në detyrë, Lulzim Basha ka përfituar kur ka drejtuar selinë blu.
Teksa për çështjen në fjalë u arrit sot dakordësia për ngritjen e një grupi pune që do të realizojë auditin e financave, me kryetare Lediana Mandia, ish-kryeministri nënvizoi se Lulzim Basha ka marrë para ruse.
Berisha hoqi përgjegjësinë nga strukturat e Partisë Demokratike, duke e cilësuar vendimin për të injektuar në organet e PD para ruse, një vendim personal të ish-kryetarit, pasi askush tjetër në selinë blu sipas tij nuk ishte në dijeni.
“Ish-kryetari ka pranuar sipas raporteve financime ruse. Ky është një akt jashtëzakonisht i rëndë. Shkelmim i parimeve themelore të Partisë Demokratike Nuk ka asnjë individ në PD, që të ketë patur dijeni për financime ruse. Në arkën e PD-së, nuk ka hyrë e as nuk ka dalë sipas dëshmive të besueshme plotësisht të zotit Ristani dhe Ilir Dervishit asnjë qindarkë nga këto para. Akt Personal i Lulzim Bashës”, tha Berisha.
Sa i përket komisionit që u ngrit sot për të realizuar auditin, Berisha zbuloi kompetencat duke thënë se do të hetojë, pasi ish-kreu i PD “asgjë s’ka lënë në zyra i ka marrë dhe hard-disc dhe për ato që do hetojë do të informojë këshillin kombëtar dhe opinion publik”.
“Sot kryesia ka vendosur të ngrejë një komision auditi për këtë aferë… ai duhet të thotë ku i mori paratë dhe si i dërgoi në Skoci, e shpëtoi një herë Rama, por kjo çështje është shumë serioze dhe ai nuk mund ta trajtojë ndryshe, por të bëjë transparencë të plotë se ka drejtuar këtë parti, ndonëse ju e dini që gjënë më të lehtë ka gënjeshtrën. Edi Rama deklaroi edhe para një jave se ato e dinim që janë para ruse, por faktikisht bëri gjithçka për të mbyllur dosjen, për të marr peng kryetarin e PD”, shtoi kreu i selisë blu.
