Dy vëllezër janë arrestuar mëngjesin e sotëm, pasi vodhën nën kërcënimi e armës xhiron ditore të një pike karburanti në Shënkoll të Lezhës.
Pas ngjarjes ata u larguan me motoçikletë.
Në cilësinë e provës materiale u sekuestruan arma e zjarrit kallashnikov, motoçikleta, skafanda dhe veshjet, që dyshohet se janë përdorur për të kryer vjedhjen dhe një sasi lënde e dyshuar narkotike kanabis, të cilat u gjetën në një shtëpi të braktisur.
“Si rezultat i operacionit policor të koduar “Ndjekja”, u arrestuan në flagrancë shtetasit D. L., 21 vjeç dhe M. L., 16 vjeç, (vëllezër) banues në Shënkoll, Lezhë, për veprat penale “Vjedhja me armë”, “Mbajtja pa leje e armëve, armëve shpërthyese dhe i municionit” dhe “Prodhimi dhe shitja e lëndëve narkotike”, të kryera në bashkëpunim,” njoftoi policia.
“2 shtetasit e arrestuar, gjatë mesnatës së datës 22 shtator, kanë shkuar me motoçikletë në një karburant në Shënkoll dhe, nën kërcënimin e një arme zjarri kallashnikov, i kanë vjedhur shitësit, xhiron ditore dhe aparatin celular. Të dy shtetasit janë larguar më pas me motoçikletë,” shtuan të njëjtat burime.
Sipas bluve, gjatë kontrolleve personale dhe në banesën e të arrestuarve, u gjetën dhe u sekuestruan edhe aparati celular që i kishin vjedhur shitësit të karburantit, si dhe një sasi lënde e dyshuar narkotike kanabis.
