Kryeministri Edi Rama ka reaguar lidhur me vendimin e një dite më parë nga qeveria, për mbylljen e kolegjit turk “Mehmet Akif”.
“Pas çdo vendimi kërkohet një qëllim tjetër nga i vërteti dhe bombardohet publiku me lajme të rreme e me teori konspiracioni! S’ka asgjë të tillë dhe asnjë qëllim tjetër përveç zbatimit të barabartë të ligjit në rastin e heqjes së një licence shkolle si plot të tjera më parë. Të shesësh godinën ku ke lejen e aktivitetit shkollor dhe të hapësh aktivitetin diku tjetër, pa marrë lejen sipas ligjit, pa plotësuar kriteret e pa përmbushur standardet e kërkuara ligjërisht, është një shkelje për të cilën ligji parashikon heqjen e licencës. Përdorimi i fëmijëve pastaj për të fshehur fajin karshi ligjit, prindërve dhe vetë nxënësve, duke luajtur rolin e viktimës së qeverisë, kur në fakt je verifikuar jo një po dy herë në shkelje, tregon ndërgjegje të ulët në raport me misionin e lartë të një vatre edukimi”, shkruan Rama në Twitter, duke dhënë një reagim të ngjashëm me atë të ministres së Arsimit, Evis Kushi.
Mbyllja e shkollës pjesë e “Turgut Özal”, i financuar nga fondacioni “Gulistan” i lakuar për lidhjet me klerikun turk Fetullah Gylen, është cilësuar gjegjësisht si një vendim i Ramës për të kënaqur Presidnetin turk Erdogan, kundërshtar i Gylen.
Edhe drejtusit e kolegjit nënvizuan faktin se rrethanat në të cilat është bërë vendimi “bëjnë të kuptojmë se jemi sjellë në një situatë të tillë si pasojë e rrethanave jo arsimore”, duke lënë të kuptohet se dyshimet janë për një vendim të motivuar nga raporti Rama-Erdogan.
