Lulzim Basha dhe mbështetësit e tij shpesh herë janë akuzuar nga shumica e demokratëve se ish-kreu i PD-së po tenton që të vendosë një “pinjoll të diktaturës” si kandidat për Avokatin e Popullit, zgjedhja e të cilit është shtyrë për në shtator.
Rreth dy muaj më parë deputeti i Partisë Demokratike, Agron Gjekmarkaj kritikonte sa për “fasadë” Lulzim Bashën për emrat e kandidatëve të propozuar për postin e Avokatit të Popullit të cilët sipas tij nuk duhet të kenë një të shkuar të errët nga diktatura. Në të njëjtin status në “Facebook”, Gjekmarkaj propozonte emrin e një kandidati që nga një vëzhgim i thjeshtë rezulton se pas vitit 90’ ka ndryshuar në mënyrë misterioze mbiemrin e familjes së tij. Kjo ngre akoma edhe më shumë dyshime për pastërtinë e figurës “Doria Gjomarkaj” që propozoi në mënyrë të nxituar vetë Agron Gjekmarkaj.
“Avokati i Popullit nuk duhet të jetë një pinjoll i diktatures! Basha dhe pasuesit e tij të pakët nuk kanë tagër për ta caktuar atë. Deputetet e PD s’kanë arsye të bëhen pis për asgjë. Dorian Gjonmarkaj i mirë shkolluar në perendim dhe familje historike i permbush kushtet”, shkroi Gjekmarkaj më 19 korrik të këtij viti.
Në një vëzhgim në rrjetin social “Facebook”, shtetasja Bianca Gjomarkaj ka shpërndarë postimin e Agron Gjekmarkaj dhe ka ngritur disa pikëpyetje për kandidatin e propozuar (Doria Gjomarkaj) i cili është një person që ka përvetësuar një mbiemër që nuk i takon. Zonja Bianca Gjomarkaj shkon më tej duke u sugjeruar deputetëve të pyesin z. Gjomarkaj në çdo seancë dëgjimorë pse ka përvetësuar një mbiemër që nuk i takon.
“Si mund të zgjidhesh Avokati i Popullit kur mbiemri yt u ndryshua pas rënies së komunizmit për të korrur përfitime?”, -pyet zonja në statusin bashkëlidhur propozimit të deputetit të PD.
“Shpjegojeni atë! Të pyesim zotin Dorian “Gjomarkaj” se çfarë mbiemri ka në çertifikatën e tij të lindjes, dhe pse u ndryshua pas vitit 1991? Pse babai i tij Preng Gjergji Pjeter Kola e ndryshoi mbiemrin e familjes? Çfarë nevoje kishte për ta ndryshuar atë në një familje të cilës ai nuk i përket, nuk i përket dhe nuk do t’i përkasë kurrë? Unë kam një çështje shumë të fortë me këdo që ka uzurpuar mbiemrin tim. Mendoj se këto janë pyetje të rëndësishme për t’u adresuar në çdo seancë dëgjimore ku ai mund të ftohet. Bianca Gjomarkaj bija e Kapidan Ndue Gjon Marku (Gjomarkaj)”, -shkruan Bianca Gjomarkaj për kandidaturën e propozuar në mënyrë të nxituar nga deputeti i PD-së.
Natyrshëm lind pyetja nëse, “Agron Gjekmarkaj ka dijeni për këtë akuzë ndaj kandidatit të tij dhe cila është arsyeja e ndryshimit të mbiemrit?” Kjo mbetet një pyetje të cilës deputeti (mbështetës i Bashës) është i detyruar t’i japë përgjigje deri sa ka marrë përsipër që të propozojë një kandidaturë që ka ndryshuar mbiemrin fill pas diktaturës komuniste.
