Kreu i Partisë Demokratike, Sali Berisha, ka konfirmuar se do të paraqitet në Prokurorinë e Posaçme për të dhënë sqarimet e tij.
I pyetur sot nga gazetarët nëse do të shkojë për të dëshmuar lidhur me privatizimin e ish-kompleksit “Partizani”, Berisha tha se nuk ka marrë ende fletëthirrje, por nëse do të marrë, do të shkojë.
“Nuk më ka dërguar asnjë fletëthirrje, por i përgjigjem çdo fletëthirrje. Ju do jeni aty të gjithë të bëjmë një konferencë shtypi të shkëlqyer. Përpjekje mjerane e Ramës për të mbuluar vjedhjet, por unë do shkoj gjithmonë sa herë të thërritem. Edhe kur falsiteti noton në detin e falsitetit unë nuk hezitoj kurrë të përgjigjem. Ta keni të qartë!”, tha Berisha.
Ditën e djeshme, 21 shtator, ish-ministri i Mbrotjes, Fatmir Mediu është paraqitur në ambientet e Prokurorisë së Posaçme (SPAK).
Mësohet se Mediu është thirrur për çështjen e privatizimit të ish-Kompleksit ‘Partizani’ ku është thirrur si deklarues për çështjen e privatizimit të godinës, ndërsa akuzohet për ‘Shpërdorim detyre’.
Më 17 nëntor 2020 Kreu i grupit parlamentar të PS, Taulant Balla, dorëzoi një kallëzim penal në SPAK, për privatizimin e kompleksit “Partizani”.
Balla ka ngritur akuzë ndaj ish-kryeministrit Sali Berisha, ish-ministrit të Mbrojtjes Arben Imami, anëtarë të tjerë të qeverisë së drejtuar nga Berisha, Jamarbër Malltezi dhëndrin e Sali Berishës, përfitues direkt i kësaj prone si dhe drejtues të shtabit të ushtrisë shqiptare bashkë me administratorët dhe aksionerët e dy kompanive ndërtuese në atë kompleks.
