Një 43-vjeçar është arrestuar nga policia e Sarandës, pasi akuzohet se ka vjedhur para dhe bizhuteri në një dyqan.
Sipas uniformave blu është arrestuar I. D., 43 vjeç, banues në Sarandë.
Ky i fundit ishte i dënuar me “arrest shtëpie” për veprën penale “Plagosja e rëndë me dashje”. Ai ka thyer masën e sigurisë dhe ka vjedhur një shumë parash dhe në një dyqan, në lagjen nr.4, Sarandë.
“Specialistët për Hetimin e Krimeve në Komisariatin e Policisë Sarandë arrestuan në flagrancë shtetasin I. D., 43 vjeç, banues në Sarandë, për veprat penale “Largimi i të burgosurit nga vendi i qëndrimit” dhe “Vjedhja”. Arrestimi i këtij shtetasi u bë pasi ka vjedhur një shumë parash dhe bizhuteri, në një dyqan, në lagjen nr.4, Sarandë. Pas verifikimeve ka rezultuar se ky shtetas ka thyer masën e sigurisë “Arrest në shtëpi”, për veprën penale “Plagosja e rëndë me dashje”, duke dalë jashtë banesës”, njofton policia.
Materialet i kaluan Prokurorisë, për veprime të mëtejshme procedurale.
