Analisti Erlis Çela ka komentuar sulmet kibernetike dhe urdhrin e Prokurorisë ndaj medieve që të mos publikojnë dokumentet të konsideruara si “sekrete” të hakerimit iranian.
Çela tha se sulmi kibernetik është ngjarje e rëndë pasi është cenuar siguria kombëtare. Duke u ndaluar tek urdhri i prokurorisë për mediat, ai theksoi se është një akt i pastër censure dhe i padobishëm për arsye se nuk parandalon asgjë, pasi të dhënat janë në “dorën” e hakerave iranianë. Gjatë intervistës për Fax News, Çela shtoi më tej se përmasat e këtij skandali janë shumë të mëdha, dhe se duhej një qëndrim më i fortë në Parlament.
“Si ngjarje është shumë e rëndë se të dhënat janë hakeruar, është cënuar siguria kombëtare. Urdhri i prokurorisë një akt i pastër censure ndaj medias , i padobishëm që nuk parandalon asgjë se të dhënat janë publikuar. I gjithë informacioni i marrë nga hakerat është tashmë online. Media ndërkombetare po i publikojnë. Cenon lirinë e medias për publikimin e informacioneve te dala që mund të kenë interes për publikun.
Sic është rasti i një ish të kërkuari. Kemi të bëjmë me një interes të lartë publik. Gazetarët, media, kanë përgjegjësi për të filtruar informacionet, se jo cdo gjë përbën interes. Përveç cenurës së dëmshme prokuroria nuk ka marrë parasysh faktin që ka precedentë të mëparshëm, si publikimi i të dhënave për patronazhistët. Nuk mund të merren urdhra të njëanshëm. Duhet një vendim gjykate.
Përmasat e këtij skandali janë shumë të mëdha, duhej një qëndrim më i fortë në parlament. Nuk ka një mbështetje për gazetarët dhe mediat. Dhe opozita është në hallet e veta”, tha Çela.
