Grupi i hakerave “Homeland Justice” ka publikuar në rrjetet sociale një sërë dokumentash këtë të Hënë, shumë prej tyre të klasifikuara si “sekret”.
Një prej tyre është një shkresë e firmosur nga Ministri i Brendshëm Bledi Çuçi, me afat të ruajtjes së klasifikimit 15 vjet.
Me shkresën e datës 7 Prill 2021, ministri Çuçi urdhëronte shpalljen non grata të dy personave, një 46-vjeçar me kombësi turke dhe një shtetase me kombësi kurde, por vendlindje në Gjermani.
Në dokument thuhet se këta shtetas përbëjnë kërcënim për Republikën e Shqipërisë.
Një tjetër dokument sekret me afat 10-vjeçar është publikuar po ashtu. Bëhet fjalë për një kërkesë drejtuar ministrit të Brendshëm Bledi Çuçi dhe ish-kreut të Policisë së Shtetit Gledis Nano nga një oficer i ndërlidhjes në Britani.
Këto janë dy ndër shumë prej dokumenteve sekrete të publikuara ditën e sotme.
Ndërkohë, kryeministri Edi Rama deklaroi dy ditë më parë se hakerat nuk kanë arritur të marrin dokumente sekrete.
