Kryeministri Edi Rama deklaroi dy ditë më parë se të dhënat e marra nga hakerat janë “krejtësisht irrelevante sa i përket sensivitetit të tyre” dhe “nuk janë dokumente sekrete”. Megjithatë në disa prej tyre, të publikuara në rrjetet sociale, gjenden shkresa të klasifikuara “sekret”.
Grupi “Homeland Justice”, që ka marrë përsipër autorësinë e dy sulmeve kibernetike në vend, publikoi këtë të Hënë në “Telegram”, materiale të reja. Të dhënat besohet se janë marrë nga hakerimi i postës elektronike të ish-kreut të Policisë së Shtetit, Gledis Nano.
Boldnews po sjell në mënyrë të përmbledhur përmbajtjen e disa prej tyre, të cilat janë të klasifikuara si “sekret”.
Një prej dokumentave, që mban datën Prill 2021, ka informacion për shtetasit shqiptarë që jetojnë në kampet siriane. Dokumenti është i klasifikuar si sekret shtetëror me afat ruajte 15 vite.
Një tjetër dokument i klasifikuar si sekret që mban datën Nëntor 2021 ka të dhëna policore për Klodian Çalamanin, i dënuar me burg përjetë për vrasjen e të miturit Mateo Vasia në Fier.
Në një shkresë sekret të datës Gusht 2021, flitet një informacion të “administruar nga Drejtoria e Antiterrorit” për Talo Çelën, person i shpallur në kërkim. Dokumenti klasifikohet si sekret me afat 10-vjeçar.
Sekret me afat 15 vjeçar është dhe shkresa ku ka informacion për një sulm të dyshuar ndaj ambasadës së Shqipërisë në Athinë.
Shkresa të klasifikuara “konfidenciale” janë publikuar po ashtu nga hakerat. Bëhet fjalë për disa dokumente të dërguara nga policia spanjolle lidhur me disa persona të dyshuar për terrorizëm. Në fund të tyre specifikohet se “informacioni i përmbajtur në këtë dokument përbën lëndë klasifikimi” dhe “transferohet për qëllimin e vetëm të inteligjencës, jo autorizimit, përdorimit të tij para organeve gjyqësore, as trajtimin e tij nga të tretët pa pëlqimin e shprehur të këtij organi qendror”.
Rama: Nuk janë marrë dokumente sekrete
Dokumentat e publikuara rrëzojë deklaratat e kryeministrit Edi Rama, i cili dy ditë më parë, gjatë një komuniki publik, deklaroi se nga hakerat nuk janë marrë të dhëna sekrete.
“Të dhënat janë krejtësisht irrelevante sa i përket sensitivitetit të tyre. Një pjesë e tyre janë publikuar, vendime qeverie, shkresa që qarkullojnë në rrjetin e brendshëm dhe të cilat mund të merren nga çdo i interesuar apo nga çdo gazetar me një kërkesë të thjeshtë, pra nuk janë dokumente sekrete apo të fshehta”, u shpreh Rama.
