Policia ka arrestuar një 32-vjeçar i cili dyshohet se ka vjedhur me dhunë varsen e floririt të nj qytetareje në qytetin e Durrësit.
Bëhet me dije se në pranga ka rënë shtetasi Jurgen Dorcai. Pas arrestimit të grabitësit u bë e mundur zbardhja e dy vjedhjeve të tjera të kryera nga Dorcai i cili po ashtu kishte vjedhur me dhunë çantën dhe varësen e dy grave të tjera në Durrës.
“Vihet në pranga 32-vjeçari që dyshohet se i vodhi me dhunë varësen e floririt, një shtetaseje. Specialistët për Hetimin e Krimeve të Komisariatit të Policisë Durrës, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve para përgjegjësisë ligjore, pas një pune të mirëfilltë hetimore, organizuan dhe finalizuan operacionin policor të koduar “Ndjekja”, si rezultat i të cilit u arrestua në flagrancë shtetasi: J. D., 32 vjeç, banues në Durrës, për veprën penale “Vjedhja me dhunë”. Ky shtetas dyshohet se më datë 16.09.2022, i ka vjedhur me dhunë varësen e floririt, shtetases Dh. M. Nga veprimet hetimore dyshohet se ky shtetas, më datë 09.09.2022, i ka vjedhur me dhunë çantën e dorës, shtetases Xh. H., ndërsa më datë 13.09.2022, i ka vjedhur me dhunë varësen, shtetases M. B”, njofton policia.
Materialet i kaluan Prokurorisë, për veprime të mëtejshme procedurale.
