Ngjarja më tragjike e kësaj vere, ishte vrasja e 7-vjeçares Jonada Avdia, nga ish-komisari i policisë Arjan Tase. Ngjarja ndodhi në plazhin e Potamit në Himarë, që u pasua më pas me protesta qytetare për drejtësi.
Po ashtu lidhur me këto seri ngjarjesh u shkarkua nga detyra edhe ish-drejtori i Policisë Gledis Nano, si dhe për rastin e 7-vjeçares, u shkarkuan nga detyra 15 drejtues e inspektorë policie, që supozohet se duhet të ishin aty duke inspektuar, e duke mbikëqyrur plazhet.
E keqja vijon më tej, pasi 15 shefat dhe inspektorët e policisë të zonës Himarë- Vlorë, nuk u hetuan nga SHÇBA as kur Gledis Nano ishte drejtor, por as nga pasuesi i tij Muhamet Rrumbullaku.
Kështu ata janë rikthyer përsëri në strukturat policore, në të njëjtën drejtori e komisariat policie dhe me të njëjtat grada e detyra, ku thjesht iu janë ndërruar zonat e shërbimit.
Theksojmë rikthimi i 15 policëve të shkarkuar për vrasjen e 7-vjeçares në plazh, është bërë 3 ditë pasi kryeministri Edi Rama, në prezantimin e drejtorit Muhamet Rrumbullaku, deklaroi:
“Jam akoma i traumatizuar e nuk më zë gjumi, prej tragjedisë që shkaktoi punonjësi i policisë në Himarë, i cili duhet të marrë ndëshkimin që meriton, por zoti ministër dhe ju zoti drejtor i ri, në polici nuk duhet të kenë më vend, as ata që nuk garantuan sigurinë e pushuesve në plazh.”-deklaronte Rama.
Kush janë 15 policët që u shkarkuan nga Gledis Nano pas ngjarjes tragjike në Himarë
Me urdhër të Drejtorit të Përgjithshëm të Policisë së Shtetit Gledis Nano u shkarkuan nga detyra
Kryekomisar Shpëtim Hasanaliaj, me detyrë Drejtor i DVKM Vlorë; Komisar Fatos Muka, me detyrë Shef Sektori i Kufirit në DVKM Vlorë;
Kryekomisar Andon Marko, me detyrë Shef Sektori i Zbatimit të Masave Plotësuese për Kontrollin e Territorit, në DVKM Vlorë;
Nënkomisarë Dritan Veizaj dhe Ervis Alisinanaj, me detyrë specialistë pranë këtij Sektori;
Inspektorë Ardian Kamaj, Granit Nuraj, Jonel Ahmeti dhe Juljan Mehmetaj, efektivë të Sektorit për Zbatimin e Masave Plotësuese për Kontrollin e Territorit, në DVKM Vlorë;
Nënkomisar Neritan Buzi, Shef Stacioni i Policisë Kufitare Dhërmi dhe Nënkomisar Daniel Likskëndaj, specialist pranë këtij Sektori;
Inspektorë Andrea Zenelaj, Besnik Limaj, Fatos Pashaj dhe Arsen Hasanaj, trupë shërbimi në Stacionin e Policisë Kufitare Dhërmi.
