24 orë pas vendimit të djeshëm, Bordi i Transparencës ka përcaktuar çmimet e reja të karburanteve.
Sipas vendimit të bordit çmimi i naftës është ulur me vetëm 8 lekë, nga 224 në 216 lekë/litër. Pavarësisht se çmimi në bursë i naftës ka rënë ndjeshëm, Bordi “komunist” i ngritur nga Edi Rama ka bërë një ulje shumë të vogël, kurse benzina do të tregtohet 194 lekë/litër. Ndërsa çmimi i gazit sot pas orës 18:00 do të kushtojë 77 lekë/litër.
Shqiptarët do të vazhdojnë të blenë naftën më të shtrenjtë krahasuar me të gjithë vendet e rajonit, ndërsa opozita në krahun tjetër ka kërkuar që urgjentisht të “shkrihen bordet komuniste” për shkak se abuzojnë me rritjen e çmimeve.
Vendimi i Bordit:
“Vendimet e Bordit të Transparencës në datë 16 Shtator 2022, janë si rezultat i levizjes së çmimeve në bursën Platts Mediteran. Si rrjedhojë çmimet e vendosura janë:
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 216 lekë/litri, ndërsa i shitjes me shumicë jo më shumë se 204 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 194 lekë/litri, ndërsa i shitjes me shumicë jo më shumë se 182 lekë/litër.
Çmimi i shitjes me pakicë i nënproduktit gaz, të jetë 77 lekë/litri me pakicë dhe i shitjes me shumicë 68 lekë/litër për automjetet.
Çmimet e caktuara nga Bordi do të hynë në fuqi sot datë 16 shtator ora 18.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes”, njofton Bordi.
