Deputeti i PD-së, Enkelejd Alibeaj ka zhvilluar një takim sot me ambasadoren e SHBA në Tiranë, Yuri Kim.
Gjatë një postimi në rrjetet sociale, Alibeaj shkruan se me Yuri Kim biseduan për sezonin e ri parlamentar, për përmirësimin e legjislacionit në fuqi dhe reforma administrative – territoriale. Ndër të tjera, Alibeaj shkruan se e ka falenderuar Kim dhe SHBA për mbështetjen që i ka dhënë Shqipërisë në përballjen me sulmin kibernetik të Iranit.
“Sot zhvillova një takim të frytshëm pune me Ambasadoren e ShBA në Tiranë Zonjën Yuri Kim.
Nisja e sezonit të ri parlamentar dhe sfidat e reja gjatë kësaj periudhe ishin në qendër të bisedës. Disa nga çështjet kryesore ishin përmirësimi i legjislacionit në fuqi, reforma administrative – territoriale dhe ecuria e Grupit Parlamentar të PD-së.
E falenderova zonjën Kim për mbështetjen që SHBA i ka dhënë Shqipërisë në përballjen me sulmin kibernetik të Iranit.
E sigurova se PD i është mirënjohëse ShBA-ve që përgjatë gjithë historisë së re dhe të vjetër të vendit tonë, ka patur mbështetjen e vazhdueshme të Amerikës” shkruan Alibeaj.
