Një tjetër person është arrestuar si bashkautor i dhunimit të 11-vjeçares në Kosovë. Përmes një deklarate për mediat Prokuroria Themelore e Prishtinës konfirmoi se i ndaluari dyshohet se ka abuzuar seksualisht me të miturën në muajin qershor dhe ka bërë me dije se do të kërkojë caktimin e masës së paraburgimit ndaj tij.
“Prishtinë, 14 shtator 2022– Prokuroria Themelore në Prishtinë, njofton opinionin publik se me urdhër të Prokurorit të Shtetit, ka ndaluar një person (madhor) në kohëzgjatje prej 48 orësh, nën dyshimin se i njëjti ka kryer veprën penale “Dhunimi”, sipas KPRK-së, lidhur me rastin e 11 vjeçares, në qershor të vitit 2022. Po ashtu, ju njoftojmë se Prokurori i Shtetit brenda afatit ligjor do të ushtrojë kërkesë për caktimin e masës së paraburgimit ndaj të pandehurit, në gjykatën kompetente”, ka njoftuar Prokuroria.
Kujtojmë që para disa ditësh, 11-vjeçarja u përdhunua nga pesë persona, për shtatë orë, ku tre prej të dyshuarve janë të mitur dhe dy të tjerë të moshës madhore. Në mesin e tyre autorëve është edhe Ekrem Rexhepi, 27 vjeç që ka të ngritur aktakuzë edhe për veprat penale si vjedhje e rëndë, vjedhje e pyllit dhe dhunë në familje
Ky arrestim e çon në 12 numrin e të ndaluarve për përdhunimin e 11-vjeçares në Prishtinë në dy periudha të ndryshme kohore. Ndërkohë pas denoncimit të rastit u zbulua se e mitura kishte qenë pre e abuzimit seksuale dhe nga 6 meshkuj të tjerë gjatë muajit qershor.
