Partia Socialiste ka rrëzuar propozimin e grupit të Alibeajt për të rritur numrin e bashkive nga 61 në 92 dhe qarqet nga 12 në 6 rajone.
Kreu i grupit parlamentar të PS, Taulant Balla ka bërë me dije se PS do t’i qëndrojë ndarjes aktuale administrative në komisionin e Posaçëm të ngritur për këtë reformë. Gjatë deklaratës për mediat, Balla tha pas mbledhjes së grupit parlamentar se ndarja aktuale ka sjellë përmirësim në shërbime në të gjithë territorin e kjo është arsyeja pse konsiderohet e duhura.
“Ka pasur propozime edhe për zvogëlim dhe zmadhim të numrit të bashkive, kështu nisur edhe nga fakti që 7 vite kanë kaluar nga reforma e fundit dhe të gjitha shërbimet publike janë përmirësuar, është përmirësuar edhe shërbimi online, duke rritur aksesin e qytetarëve, kemi konkluduar që pozicioni ynë në Komisionin e Posaçëm të Reformës Territoriale, do jetë ti qëndrojmë ndarjes aktuale”, tha Balla.
Pas vendimit të qeverisë ka reaguar dhe Partia Demokratike, ku bashkë-kryetarja demokrate e komisionit të posaçëm të reformës territoriale, Dhurata Çupi tha se kjo është tallje me Parlamentin dhe partnerët që u angazhuan në një diskutim për ndryshimin e hartës territoriale.
“Është tallje me qytetarët që duan ndryshim tê hartës. Është tallje me partnerët që u angazhuan në proces. Është tallje me parlamentin. Është shpërdorim i taksave të qytetarëve, për një proces të paracaktuar nga vullneti i Edi Ramës. Edi Rama ka frikë të përballet në një betejë të vërteta elektorale dhe kërkon rezultat ne tavoline. Kështu ka bërë në çdo zgjedhje. Kur ndryshoi hartën territoriale në 2015, kur ndryshoi në mënyrë të njëanshme sistemin zgedhor. Edi Rama ka frikë nga vota. Përgjigja e qytetarëve do të jetë referendumi. Ne do të kërkojmë referendum për ndryshimin e hartës territoriale. Askush nuk mund të dalë mbi vullnetin e zgjedhësve”, ka thënë Çupi.
