Partia Socialiste rrëzon propozimin e grupit që mbështet Alibeajn i cili kërkoi ndryshime në hartën territoriale duke shtuar numrin e bashkive nga 61 në 92 dhe qarqe nga 12 në 6 rajone.
Gjatë një deklarate për mediat në dalje të Kryesisë së Kuvendit, Alibeaj e etiketoi si provokim vendimin e Taulant Ballës dhe PS që sipas tij kërkon të fitojë zgjedhjet në tavolinë. Alibeaj theksoi se pushteti vendor është kthyer në një çerdhe militantësh ndërsa qytetarët nuk marrin asnjë shërbim.
“Sot diskutuam çështjet politike aktuale. Jeni njohur me vendimin e bërë nga Taulant Balla i cili nuk është as pjesë e komisionit. Komisioni ende vijon punë”, tha fillimisht Alibeaj
Pyetje: Nuk do të ketë asnjë ndryshimi në Reformën Territoriale?
“I jemi futur kësaj reforme, është një kërkesë që ka lindur në vitin 2014, reforma e asaj kohe u bë në mënyrë të njëanshme. Kjo e sotmja është një provokim se si mund të thuash pa mbaruar afati i reformës se ne nuk pranojmë asnjë ndryshim. 7 bashki janë të falimentuara, shërbimet nuk i jepen më qytetarëve as në qendrën e qytetit më të madh dhe as në periferinë e vendit. Pushteti vendor është kthyer në një çerdhe militantësh. Arrij ta kuptoj se pse e bëjnë, a e kujtoni si u bë reforma në 2015, ishte synimi për të fituar zgjedhjet lokale në tavolinë ajo që u tha sot qenka skema që dhe zgjedhjet e 2023 t’i fitojnë në tavolinë. Kjo reformë është një test i funksionimit të demokracisë. Përdorin forcën e kartonit dhe pse është një forcë e vjedhur”, tha Alibeaj.
