Kryetari i Partisë së Lirisë, Ilir Meta ka kujtuar viktimat e sulmit terrorist të “11 shtatorit” në New York ku 2,977 persona humbën jetën nga përplasja e avionëve në dy qendrat tregtare, sulmi më i rëndë terrorist në tokën amerikane, i marrë përsipër nga Al-Kaeda.
Gjatë një postimi në rrjetet sociale, Meta ka shpërndarë një foto të flamurit amerikan me mbishkrimin “kurrë nuk harrojmë”. Meta shkruan se “Shqipëria dhe SHBA po bashkëpunojnë për të mbrojtur vlerat e lirisë dhe demokracisë, si vend anëtare e NATO-s është e angazhuar kundër terrorizmit ndërkombëtar dhe ekstremizmit të dhunshëm”.
“Nderojmë sot kujtimin e paharruar të jetëve të pafajshme të humbura në sulmet terroriste të 11 shtatorit dhe solidarizohemi me familjet e tyre dhe të gjithë popullin amerikan! Shqipëria dhe SHBA, gjithmonë bashkë në mbrojtje të vlerave të lirisë, demokracisë dhe bashkëjetesës, aleancës strategjike dhe miqësisë së shkëlqyer mes kombeve tona. Krah për krah, si anëtare të NATO-s, në çdo angazhim kundër terrorizmit ndërkombëtar, ekstremizmit të dhunshëm dhe çdo kërcënimi, që rrezikon paqen dhe stabilitetin në botë”, shkruan Ilir Meta.
