Sekretari i Përgjithshëm i Partisë së Lirisë, Tedi Blushi, ka reaguar pas deklaratës së ministrit të Brendshëm Bledi Çuçi, i cili në një emision televiziv, deklaroi se vrasje do ketë gjithmonë dhe se nuk ka zhvillim pa krimin.
Blushi, teksa ka postruar dhe videon në Fb, ka shkruar se në ndonjë vend të zhvilluar të botës, ministri i Brendshëm do të ishte shkarkuar për këtë deklaratë.
“Krimi është oferta e vetme e Edi Ramës për zhvillimin e Shqipërisë. Vetë Ministri i Brendshëm, publikisht dhe paturpësisht pohon se: “Nuk ka zhvillim pa krimin” dhe në këtë rast autori dihet çfarë ka dashur të thotë. Këtu e ka dhe burimin shkelja e ligjit, kapja për fyti e shtetit dhe e drejtësisë, mungesa e rendit publik dhe rritja e pasigurisë së jetës, vjedhjet dhe abuzimet me taksat e shqiptarëve. Një Ministër i Brendshëm, në çdo vend të Europës do të ishte shkarkuar në sekondë nga detyra, në rast se do të bënte një pohim të tillë kaq tronditës për opinionin dhe po aq frymëzues për krimin. Por në Shqipëri kjo nuk ndodh sepse krimi e ka sot kumbarin e tij në krye të Qeverisë”, shkruan Blushi.
Teksa akuzoi Edi Ramën se ka “krimin” si ofertën e vetme për të zhvilluar Shipërinë, Blushi, deklaroi se çdo shtet ka mafien e tij, por këtu mafia ka shtetin e vet. Ai thekson se shporrja e Ramës, kumbarit të krimit është prioriteti kryesor.
“Është kjo është arsyeja pse 10 vite në pushtet Edi Rama e kanabizoi Shqipërinë, u hapi portet, aeroportet dhe të gjitha rrugët trafikantëve të drogës, “bekoi” vrasjet dhe atentatet mafioze në qendrat e qyteteve me parullën “hëngshin kokat e njëri-tjetrit”, e ktheu Tiranën në “lavatriçe” të pastrimit të parave të pista me kullat shumëkatëshe, përdori bandat për vjedhjen e votave, “gradoi” trafikantët me mandat deputeti, i emëroi kryebashkiakë dhe drejtorë në administratë, kriminalizoi Policinë e Shtetit dhe dekonspiroi aksionet për kapjen e të shumëkërkuarve. Çdo shtet ka mafien e tij, por këtu mafia ka shtetin e vet. Ndaj shporrja një orë e më parë e kumbarit të krimit, Edi Rama është sot prioriteti ynë kryesor!”, përfundon Blushi.
