Policia ka njoftuar këtë të Premte gjobitjen e një 49-vjeçari, i cili po drejtonte një gomone në plazhin e Borshit, duke mos respektuar zonën e kufizuar për lëvizjen e mjeteve lundruese.
Në një njoftim për mediat, policia bën me dije se shërbimet e Policisë Kufitare në Borsh dhe Sarandë, kanë konstatuar se mjeti lundrues tip gomone, me drejtues shtetasin I. H., nuk dispononte dokumentacionin përkatës në bord.
Nga shërbimet e Policisë Kufitare është bërë menjëherë shoqërimi dhe bllokimi i mjetit lundrues, në portin e Sarandës.
“Në bazë të ligjit nr.43 të vitit 2020, neni 24/1/c, drejtuesi i mjetit lundrues, shtetasi I. H. u ndëshkua me masën administrative 500.000 lekë të rinj, për mosrespektimin e zonës së kufizuar për mjetet lundruese. Gjithashtu, në bazë të ligjit nr.127, datë 15.10.2021, neni 14/1/b, ky shtetas u ndëshkua me masën administrative 10.000 lekë të rinj, për mungesë dokumentacioni (në bord)”, njofton policia.
