Një nga dy anijet e planifikuara të vendosen të Triport të Vlorës për prodhimin e energjisë elektrike përmes djegies, raportohet se ka mbërritur në ujërat shqiptare.
Deri më 15 shtator, tha pak ditë më parë në një interviste televizive kreu i KESH Ergys Verdho, të dy anijet do të stacionohen në Vlorë.
Anijet u përmendën edhe një ditë më parë në kontekstin e një zhvillimi pozitiv nga kryeministri Edi Rama, i cili tha se më shumë energji elektrike do të prodhohet për nevojat e vendit.
Megjithatë, opozita ka një tjetër këndvështrim për nismën. Dy javë më parë, kryetari i PD-së Sali Berisha do të dilte në një konferencë për mediat, ku do të lajmëronte se një nga dy anijet ka hyrë në kanalin e Suezit.
Ish-kryeministri u ndal në dy aspekte, kostoja dhe impakti mjedisor. Kostoja për dy vite qira del mbi 761 milionë euro, tha Berisha, ndërsa e quajti iniciativën një mega-aferë korruptive të qeverisë dhe kryeministrit Edi Rama.
Berisha i quajti anije-gjenerator dhe paralajmëroi se do krijojnë një ndotje në Vlorë të barabartë sikur të shtohen 100 mijë makina dhe këto të bëjnë 100 km rrugë brenda qytetit. “Është një çmenduri. A mund të rrihet në Vlorë në këtë situatë”, u shpreh ai.
Aktivistë mjedisore po ashtu e kanë kundërshtuar nismën duke folur për një impakt shkatërrues në mjedis.
Këtë mëngjes, një grupim qytetarësh i quajtur “Aleanca për Mbrojtjen e Gjirit të Vlorës” ka dalë në protestë kundër nismës së qeverisë.