Nga Boldnews.al
Shumë i ashpër u duk kryeministri Edi Rama me ndërtimet pa leje të kullave dhe pallateve që kanë mbytur Tiranën. Në dukej ishte një “reagim prej shtetari” që kërkon të vendosë ligjin tashmë që ka dhjetë vite që shkilet hapur nga çdo skutë e pushtetit, nga maja deri në fund. Edhe pse nuk e përmendi asnjëherë, indirekt Rama shkundi Lali Erin e Bashkisë së Tiranës. Ndërtimet e frikshme me dhe pa leje po bëhen nën sytë e tij, e ca më rëndë me miratimin e tij dhe një grupi të vogël oligarkësh, që tashmë e kanë kuptuar që të rrish pranë Lalit dalin “punëmbaruar”.
“Nja 5 mijë metra katror janë këtu ngjitur me sheshin “Skënderbej”, do t’i marrim ose do të na i japin. Këtu do t’i bëj thirrje ndërtuesve të përfshirë në këtë çorbë që mos përdorin klientët si pengje as mos mendojnë se ka rrugëdaljeje tjetër. Flasim për milionerët që ndërtojnë kate pa leje që hapen majtas ose djathtas, do shemben ose konfiskohen, plus paguhet gjobë dhe dërgohet për ndjekje penale”-deklaroi Rama. Po për çfarë pallati bëhet fjalë? Burime të Boldnews.al mësojnë se këtë “çorbë” sikurse e quan Rama dyshohet se e gatoi me duart e të tjerëve Fatmir Xhafaj dhe Lali Eri nëpërmjet kompanisë “Arlis”, pronari i së cilës njihet si mik i dyshes politike Xhafaj-Veliaj.
“Nuk ka asnjë mundësi tjetër. Është e papranueshme që të imagjinohet, e jo më të që ndodhi që të sulmohen biznese, pikërisht nga ai segment i policisë së shtetit që duhet të merret me krimin ekonomik. Kjo mund të ndodhë kur trimat që marrin pjesë në raprezaljet banditeske në dyert e biznese kanë bekimin e shefit, apo të shefit të shefit të tyre dhe nuk ka si të ndodhë ndryshe”-tha Rama. Po kush qenka “shefi i shefit të tyre”? Vetë Rama e ka të qartë, ndërsa krimi ekonomik di mirë të bëjë “ekonomi personale”. Edhe në dyert e pallatit që Ramës po i ze sytë “krimi ekonomik” ka shkuar, por shpejt u bënë “pronarë” të hyrjeve, madje një kat me pamje fort të këndshme po përfundon si “klering” në atë pjesë elitë të drejtësisë së re me emër të madh dhe punë fare të vogël.
Mirëpo në këtë rast dhe shumë të tjera Veliaj nuk është vetëm përgjegjës moral, por do të preket edhe nga ligji, gjithnjë nëse ky i fundit funksionon, pasi deri më tani është e qartë se SPAK nuk ka ndërmend të “peshkojë” kaq “thellë, atë në moçalin institucional pranë sheshit Skënderbej.
Bashkia e Tiranës ka në organikë dhe drejtim INUV-in (Inspektoriatin Ndërtimor Vendor), gjithashtu edhe Policinë Bashkiake. Të dyja këto institucione ndër detyrat e tjera e kanë të përcaktuar që duhet të ndërhyjnë në çdo rast kur konstatojnë ndërtime pa leje. A nuk i pa Veliaj pesë katet pa leje që të zenë edhe diellin e mesditës? Po atë pallatin tetë kate tërësisht pa leje sipas Ramës?
Po kryeministri u kujtua sot që Tirana dhe qytetet e tjera të mëdha qenkan mbushur me pallate pa leje? E gjithë loja është një spektakël që Rama e jep çdo muaj, e veçanërisht çdo shtator kur vendos kasetën e vjetër që gjoja do e shkulë nga themelet paligjshmërinë. Gjithsesi në rastin konkret situata është e qartë: duelet brenda kupolës së pushtetit mund të nisën shpejt në mbrojtje të parasë së errët që del kudo, nga droga, inceneratorët, konçesionet dhe tenderat publik. Ndoshta shprehja “hëngshin kokat e njëri-tjetrit” tashmë po zbret në elitën drejtuese politike, por në çdo rast i kanë mundësitë të merren vesh kur thela ndahet.
