Një 47-vjeçar është arrestuar nga policia e Gjirokastrës i akuzuar se organizonte veprimtarinë e dhënies ndihmë refugjatëve, me qëllim kalimin e paligjshëm të kufirit, kundrejt fitimit.
“Specialistët e Seksionit për Hetimin e Trafiqeve të Paligjshme, në bashkëpunim me Seksionin Operacional dhe Forcën e Posaçme “Shqiponja”, nën drejtimin e Prokurorisë, organizuan dhe finalizuan me sukses operacionin policor të koduar ‘Road Guard 38’, si rezultat i të cilit u ndalua shtetasi N.M., 47 vjeç, banues në fshatin Dervician, Gjirokastër. Ndalimi i shtetasit të mësipërm u bë pasi nga veprimet hetimore të kryera rezultoi se ky shtetas ka qenë organizatori i disa rasteve të dhënies ndihmë emigrantëve nga vendet MENA, për kalim të paligjshëm të kufirit, kundrejt përfitimeve monetare, që varionin nga 350 euro deri në 1500 euro për person”, njoftoi policia.
“Nga hetimet e kryera është dokumentuar se shtetasi N. M. është organizator i rasteve të dhënies ndihmë emigrantëve të paligjshëm për kalim të paligjshëm të kufirit, që janë goditur gjatë operacioneve policore ‘Road Guard 32’, ‘Road Guard 33’, ‘Road Guard 35’ dhe ‘Road Guard 36’, si rezultat i të cilëve janë arrestuar shtetasit B. T.; K. H.; Ç. H; E. T.; S. V., si dhe shtetasit pakistanez M. A.; A. M. dhe J.A.”, shtuan të njëjtat burime.
Në cilësinë e provës materiale u sekuestruan 1 automjet, 5 aparate celulare, 870 euro dhe 10 000 lekë.
I arrestuari akuzohet për veprën penale “Dhënia ndihmë për kalim të paligjshëm të kufirit”, kryer në bashkëpunim.
