Detaje të reja kanë dalë nga vrasja e biznesmenit shqiptar të ndërtimit në Rodos të Greqisë, Xhani Topalli. Media greke “Protothema” shkruan se dy goditje të forta në kokë, i shkaktuan vdekjen 46-vjeçarit me origjinë shqiptare.
Në këtë përfundim ka dalë ekspertiza mjeko-ligjore, ku nënvizohet se 46-vjeçari nuk është mbytur, por nga goditjet që ka marrë në kokë.
Babai i tre fëmijëve të mitur, i cili jetonte në Rodos, u gjet i pajetë mëngjesin e djeshëm, në zonën mes Psinthos dhe Afandos. Ndërkohë ka dyshime se ai mund të jetë vrarë nga babë e bir, pronarë të një hoteli në Rodos më 28 gusht.
Pas vrasjes pronari i hotelit ka tentuar të fshehë trupin, duke lëvizur nga vendi i ngjarjes.
Shkak i ngjarjes së rëndë dyshohet se ka qenë një borxh që pronari i hotelit i ka pasur biznesmenit shqiptar që prej vitit 2019.
Mirëpo, babë e bir, të paktën në hetimet paraprake, deklarojnë se ka qenë një aksident e gjithë ngjarja. Ata pretendojnë se biznesmeni në gjendje të dehur ka sulmuar 20-vjeçarin.
Ndërkohë vijojnë hetimet nga ana e policisë.
