Tedi Cara, sulmuesi anësor i Partizanit, ka dalë para mediave ditën e sotme dhe fillimisht foli për fitoren e fundit ndaj Bylisit. “Ne e kishim përgatitur ndeshjen në bazë të asaj çfarë kërkonte trajneri. Ne duhet të vraponim më shumë. Ajo është një fushë që s’të lejon të luash mirë me topin. Ndoshta kemi zhgënjyer pak, por më e rëndësishme janë tre pikët të marra në Ballsh”.
EUFORIA NË SKUADËR – “Kemi punuar dhe jemi me këmbë në tokë. Kemi menduar për tre pikët dhe i kemi marrë. Nuk kemin menduar për titullin sepse është ende herët dhe çdo ndeshje do të marrim maksimumin”.
KUNDËRSHTARI RADHËS ERZENI – “Do ta vlerësoja maksimalisht Erzenin. Në këto dy vite kemi lënë pikë me këto ekipe që duken të lehta në letër, por që janë të vështira në fushë. Erzenin do ta vlerësojmë maksimalisht sepse është një skuadër e fortë në fushë. Janë kthyer pas 19 vitesh në Superiore, kështu që dhe ata do të japin maksimumin ndaj Partizanit”.
DO TË VIJOJË ECURIA POZITIVE? – “Mendoj se po. Kemi një grup cilësor këtë sezon. Kemi lojtarë të mirë, rrimë të bashkuar. Ka një kimi mes të gjithëve. Na ka ecur mirë deri tani dhe mendoj se do të vazhdojmë kështu”.
GJENDJA E SKUADRËS – “Pas dy javësh do e shihni më mirë Partizanin. Trajneri na ka futur ide të mira dhe me kalimin e kohës do të mësojmë dhe më shumë. Dhe me marrjen e pikëve të jep një qetësi. Do të përmirësohemi dhe më tepër”.
KENI PUNUAR INDIVIDUALISHT? – “Është e vërtetë që nuk e kam nisur siç duhet, por kam kontribuar për Partizanin. Sa herë të më jepet mundësia do të kontribuojë për skuadrën. Normal në aspekti individual është të jem titullar. Vitin e kaluar kam qenë titullar dhe kam shënuar gola. Edhe këtë vit pres të jem titullar dhe sa herë të më jepet mundësia unë do të jap maksimumin. Për sa i përket minutave është zgjedhje e trajnerit”.
