Qeveria ekzekuton vendimin e Gjykatës së Strasburgut për të Drejtat e Njeriut dhe do të dëmshpërblejë me 13 500 euro tre pjesëtarë të familjes Alushi të cilët në 2014 u dhunuan nga policia shqiptare.
Në vitin 2014, policia hyri në banesën e familjes Alushi në Fier dhe sulmoi disa pjesëtarë të saj. Ata pretenduan se donin të arrestonin një person në kërkim në zonën rurale me shumicë rome ku banonte familja. Raporti i policisë pretendon se policët e kapën individin, por u përballën me një turmë prej 50 romësh, të cilët i kërcënuan se do të ushtronin dhunë ndaj policëve nëse nuk i lironin të ndaluarit.
Gjykatë në Fier shpalli fajtorë individët pjesëtarë të tre brezave të së njëjtës familje për pengim të policisë për të ushtruar detyrën. Ata pretenduan vazhdimisht se kishin qenë policët ata që i kishin sulmuar dhe e ndoqën çështjen në gjykatën evropiane.
Me vendimin përfundimtar të kësaj gjykatës së Strasburgut marrë më 14 qershor 2022 shteti u detyrohet Besnik Alushi, Nikollaq Alushi dhe Panajot Alushi, vlerën 4 500 (katër mijë e pesëqind) euro secilit.
Sot qeveria vendosi ekzekutimin e vendimit të gjykatës së Strasburgut datë 14.6.2022, për çështjen “Balkasi dhe të tjerë kundër Shqipërisë”, në shumën totale 13 500 (trembëdhjetë mijë e pesëqind) euro në lidhje me dëmin jopasuror, plus çdo taksë që mund të jetë e aplikueshme.
Vlera e përcaktuar si detyrim në pikën 1, të këtij vendimi, konvertohet në lekë, në bazë të kursit të këmbimit të bankës ku depozitohen shumat, në datën e kryerjes së pagesës.
Pagimi i shumës së depozituar, bëhet nga Ministria e Financave dhe Ekonomisë, pas paraqitjes së dokumentacionit të nevojshëm ligjor për kryerjen e pagesave nga buxheti i shtetit, brenda afatit 3-mujor, nga dita kur vendimi i Gjykatës është bërë përfundimtar.
Në rast mospagimi brenda afatit 3-mujor, të përmendur në pikën 4, të këtij vendimi, mbi shumën e përmendur paguhen interesa të thjeshta të barabarta me kursin marzhinal të huas së Bankës Qendrore Evropiane, gjatë periudhës së mospagimit, plus 3%.
Efektet financiare, të parashikuara për ekzekutimin e këtij vendimi të përballohen nga fondi rezervë i buxhetit të shtetit për vitin 2022.
Cfarë ka ndodhur
Në vitin 2014, Gjykata e Fierit shpalli fajtorë dhe dënoi me 4 muaj burg me kusht tre gjenerata të një familjeje nga fshati Roms i Fierit si dhe një kushëri të tyre, nën akuzën se këta persona kishin dhunuar disa punonjës së policisë së shtetit gjatë një operacioni policor.
Sipas raportit të tyre të policisw, efektivwt kishin kapur të kërkuarin, por u përballën me një turmë prej 50 romësh, dhe u detyruan ta lëshojnë nën kërcënimin për dhunë. Ata identifikuan Nuri Alushin, në atë kohë 63 vjeç, të birin e tij, Besnikun, 44 vjeç, dy fëmijët e Besnikut, Panajotin dhe Nikollaqin, 24 dhe 21 vjeç, dhe një kushëri të tyren, Edmond Balkasi, 39 vjeç, si personat që i dhunuan dhe nuk i lejuan që të arrestonin të kërkuarin.
Ndryshe nga sa pretenduan oficerët e policisë, anëtarët e familjes Alushi, e cila në atë kohë shiste këpucë, thanë se në fakt, ata ishin përballur me katër persona të dhunshëm dhe të paidentifikueshëm me maska në oborrin e shtëpisë së vet, në një orë të vonë të natës. Bashkëshortja e Besnikut i pyeti se çfarë kërkonin, por njëri prej tyre e përplasi përtokë ndërsa një tjetër goditi Besnikun me grusht. Ndërsa familjarët bërtitën, shumë fqinjë filluan të grumbullohen. Duke dëgjuar zërat rrotull, tre prej agresorëve arratisen me vrap, i katërti heq maskën dhe prezantohet si oficer policie. Familja e njihte këtë oficer policie si oficer, por njëkohësisht edhe si pronar të një kioske bixhozi në lagjen e tyre. Policët largohen pa telashe të tjera.
GJEDNJ vlerwsoi se nuk u hetua dhuna dhe e urdhëroi atë t’i paguajë viktimave të dhunës së policisë dëmshpërblimin e përcaktuar por nuk gjeti shkelje të nenit 14 të Konventës, i cili ndalon diskriminimin në bazë të përkatësisë etnike./OraNews
