Në media është raportuar se Qendra Kombëtare e Biznesit ka pezulluar statusin aktiv të kompanisë ajrore Ail Albania, pasi ajo nuk deklaroi pronarët përfitues dhe bilancin e tre viteve të fundit.
Sa i përket kësaj, ministrja e infrastrukurës dhe energjetikës dhe zëvendëskryeministrja Belinda Balluku u shpreh se Air Albania është një kompani ajrore private dhe shteti ka vetëm 10% të aksioneve. E sa i përket pronarëve privat të saj, ministrja deklaroi se një ndër to është Turkish Airline, e cila mund të mos jetë në dijeni të dokumentacioneve dhe legjislacionit shqiptar.
“Komenti i parë që unë do të bëj është që ajo është një kompani private në 90% të aksioneve të saj dhe shteti shqiptar ka 10% të aksioneve. Fakti që QKB-ja zbaton ligjin pavarësisht se shteti është 10% aksioner tregon se sa mirë funksionojnë strukturat shtetërore. Ndërkohë sa i përket procesit, unë jam informuar sot paradite që është një proces rutinë që i ndodh çdo kompanie kur ata nuk dorëzojnë dokumentacionin e duhur për të pasur dritën jeshile nga QKB-ja. Kështu i është kërkuar AirAlbania-s duke qenë se një nga pronarët është Turkish Airline, është pronar i huaj. Nuk është i mësuar me rregullat e Republikës së Shqipërisë, që të dorëzojë menjëherë përfituesin fundor, pasi ky ka qenë dhe problemi i shtruar nga QKB-ja. Nga informacionet që kam di që do të kryhet brenda ditës së sotme, nuk është asgjë e jashtëzakonshme,” tha ajo.
Gjithashtu, ajo shtoi se Air Albania pas muajit tetor do të ketë një zgjerim të avionëve (flotës) dhe fluturimet e destinacionet.
