Ilir Meta ka lajmëruar se të Martën e javës së ardhshme, Partia e Lirisë do të organizojë protestë te inceneratori i Tiranës në ora 18:00.
“Protesta e parë e Partisë së Lirisë, do të jetë më 13 shtator, ora 18:00, në inceneratorin e Tiranës, ‘kryeveprën’ e korrupsionit të Qeverise. Ftojmë të gjithë ata që kanë dëshirë të protestojnë”, tha Meta.
Deklaratën e bëri në një konferencë për mediat ku denoncoi autoritetet për djegien e mbeturinave në Shijak. Meta tha se kjo bëhet në një kohë kur paratë e qytetarëve po vidhen përmes inceneratorëve, që janë jashtë funksionit.
Ilir Meta u shpreh se Edi Rama po bën një “sulm kimik” në Shijak.
“Ta kthesh atë zonë të mrekullueshme në një vend terrori ndaj qytetarëve për t’i frikësuar ata që të mos protestojnë për plehrat që ua depozitojnë si male përpara shtëpive të tyre dhe të mos ankohen dhe kur ua djegin hapur dhe qëllimisht është shumë e rëndë dhe e papranueshme, aq më tepër të gënjesh pas kapjes në flagrancë”, u shpreh Meta.
