Tre persona janë arrestuar nga policia pasi janë kapur duke ndihmuar 50 emigrantë ilegalë, me destinacion final vendet e BE-së.
Të arrestuarit janë Donald Lleshi 24 vjeç, Muhedin Bajraktari, 30 vjeç, dhe Marin Gjoka, 25 vjeç, për veprën penale “Ndihma për kalim të paligjshëm të kufijve”.
Shërbimet e Seksionit për Hetimin e Trafiqeve të Paligjshme në DVP Tiranë, në bashkëpunim me Forcën e Posaçme Operacionale dhe Forcën e Posaçme “Shqiponja”, në fshatin Mëzez, në rrugën “7 Nëntori”, kanë konstatuar mjetet me drejtues shtetasit Marin Gjoka dhe Muhedin Bajraktari brenda të cilëve ndodheshin 50 shtetas të huaj.
Po ashtu bëhet me dije se në kërkim është shpallur shtetasi D. Sh., 29 vjeç.
“Në cilësinë e provës materiale u sekuestruan 2 automjetet dhe 6 aparate celulare. Materialet procedurale i kaluan Prokurorisë, për veprime të mëtejshme’, njofton policia këtë të Hënë.
