Një biznesmen shqiptar në Itali, i cili ishte denoncuar i zhdukur nga familja dy ditë më parë, është gjetur i vrarë me armë zjarri.
Viktima i identifikuar si Fatmir Ara, 43 vjeç, është gjetur në një zonë fshati në San Carlo Canavese (Torino) i qëlluar disa herë me armë zjarri, referuar raportimeve të mediave italiane.
Mediat shkruajnë se trupi i pajetë është gjetur në tokë, pak hapa larg një automjeti të errët, të parkuar përgjatë një rrugice. Biznesmeni ishte larguar nga shtëpia e tij në Torino, më 2 shtator.
Raportohet se ai ishte pronar i “Nuova Edile”, kompani ndërtimi.
Ara, sipas të njëjtave burime, ishte në arrest shtëpiak, por me leje për të shkuar në punë. Sipas “torinoggi“, në vitin 2018 ishte denoncuar nga bashkëshortja për dhunë. Nën akuzë asokohe përfundoi dhe një efektiv policie italian, fqinj me shqiptarin, të cilin ky i fundit i kishte kërkuar të kërkonte informacione në një databazë.”Torino.corriere” raporton se 43-vjeçari kishte precedentë për krime kundër pronës dhe armëmbajtje pa leje.
Ende nuk ka një pistë konrete për vrasjen e shqiptarit, ndërsa një hetim ka nisur nga autoritetet.
