Mekaniku italian 53-vjeçar, Davide Cristiano Mossali, nga Palazzolo, i dyshuari kryesor për vrasjen e Nexhat Ramës nga Kosova, ka deklaruar se është i pafajshëm.
Mossali me rekord kriminale, pak para se të ndalohej, përsëriti se nuk e kishte vrarë Nexhat Ramën, ndërkaq ka thënë se në momentin kur ka ndodhur krimi ishte duke drekuar me familjen.
Por bashkëshortja dhe djali i tij e mohuan, duke thënë se ai nuk ka qenë me ta.
”Duket i hutuar, por gjithsesi mohon çdo keqbërje”, thotë avokati Stefano Forzani, i cili dje ka takuar Mossalin.
Dyshohet se mekaniku e ka thirrur viktimë në biznesin e tij dhe e ka qëlluar për vdekje. Më pas trupin e pajetë e ka vendosur në bagazhin e Range Rover, në emër të vëllait të Nexhat Ramës, dhe i ka vendosur flakën mjetit me benzinë.
Mendohet se Rama, me të cilin mekaniku kishte një biznes për shitjen e makinave të përdorura, i kishte marrë rreth 30 mijë euro hua pasi ishte në vështirësi financiare. Megjithatë, ajo kredi do të ishte rritur në kufirin e kamatës, ndaj dhe mendohet se e ka vrarë.
