Tre atentate me armë zjarri janë shënuar vetëm gjatë pasdites së sotme në vend, ku si pasojë ka vdekur një person dhe është plagosur një tjetër.
Atentati i parë u shënua në lagjen “Guerrile” në Shkodër ku mbeti i vdekur shtetasi Ismet Çekorja 57 vjeç, i cili ndërrroi jetë në spital pas shtatë plumbave të marrë. I ndjeri kishte dhënë një intervistë ditë më parë për mediat, ku deklaroi se djali i tij, Bajram Çekorja nuk ishte i përfshirë në atentatin e dështuar ndaj Alban Bruçit mbrëmjen e 25 gushtit në Shkodër.
Tjetër atentat në armë zjarri u shënua në Dibër ku pas një konflikti të çastit, Besnik Sulxhaferi plagosi 45 vjeçarin Agron Delishi i cili u dërgua me helikopter drejt spitalit të Traumës në Tiranë.
Ndërsa së fundmi, mbrëmjen e sotme, u qëllua me armë zjarri ndaj automjetit tip “Audi” ku po udhëtonin dy efektivet e policisë, Anxhelo Breshani dhe Nako Mehmetaj të cilët po ktheheshin nga palestra kur u sulmuan nga një person që udhëtonte në automjetin tip “Wolswagen”.
Autorët e atentatit fatal në Shkodër dhe atentatit ndaj dy policëve në Vlorë, ende nuk janë zbuluar nga autoritetet.
Ajo çfarë vihet re është shtimi i ngjarjeve kriminaleve dhe atentateve me armë zjarri në vend. Së fundmi shënjestra të atentatit kanë qenë edhe dy efektivë policie, duke treguar se tashmë persona me precedentë kriminalë nuk frikësohen nga ligji.
