Ylli i famshëm botëror, Britney Spears ka rrëfyer detaje për kujdestarinë 13-vjeçare nga i ati dhe ka zbuluar të dhëna rrënqethëse në deklaratat e saj.
Ajo ka postuar një mesazh audio në Youtube ku ndan të gjithë përjetimin, por tashmë videoja 22-minutëshe është bërë private. Ajo tregon se një skuadër SWAT hyri në shtëpinë e saj kur i ati mori kujdestarinë dhe ajo u vendos me forcë në barelën e një ambulance.
“Përdora një theks britanik për të folur me një mjek që të më rekomandonte një mjekim dhe tre ditë më vonë në shtëpinë time hyri një skuadër SWAT, tre helikopterë”.
Gjatë turneut të saj Britney tha se edhe në shtëpinë e saj, kontrollohej nga njerëz të tjerë teksa bënte dush apo vishej, raporton yahoo.com.
“Nuk kishte drogë në trupin tim, as alkol, asgjë. E vetmja gjë që mbaj mend është se bëja siç më thoshin. Më thoshin çdo ditë se isha e shëndoshë, duhej të shkoja në palestër. Nuk mbaj mend të jem ndierë ndonjëherë aq e demoralizuar dhe ata më bënin të ndihesha si askush. Vazhdova rrugën sepse kisha frikë”, tha ajo.
Kujdestaria e Jamie Spears mbi të bijën nisi kur ajo ishte rreth 25 vjeç dhe beteja ligjore përfundoi vitin e kaluar.
