Qeveria e drejtuar nga Edi Rama duket se po i hap rrugë riformalizimit basteve sportive, të mbyllura në Janar 2019.
Më shumë se 3 vite më parë, kreu i qeverisë Edi Rama do ta mbronte nismën qeveritare duke deklaruar se ky ves duhej zhdukur pasi shkatërronte familjet. Ai do të deklaronte se bastet janë shumë të përhapura dhe të lidhura me burimet kriminale të financimit. Megjithatë, një kategori e caktuar lojërash fati siç janë kazinotë e telebingot, do të vijonin veprimtarinë normalisht falë pajisjes me një licence të posaçme.
Sot, duket se kryeministri ka ndryshuar mendje lidhur me bastet sportive dhe po konsideron rihapjen e tyre.
Këtë të mërkurë, Rama zhvilloi një dëgjesë publike lidhur me mundësinë e riformalizimit të basteve sportive.
Në një postim në faqen e tij në FB, ku u transmetua aktiviteti, ai e paraqiti sikur kishte marrë një propozim për këtë dhe nuk është ai nismëtari.
Tonin Vocaj, drejtuesi i sapo komanduar i Policisë së Shtetit lexoi një komunikatë të gjatë, për të dëshmuar se aktiviteti i basteve sportive vijon ende në të zezë. Në fund të fjalës, kërkoi formalizimin. Folësit e tjerë në këtë aktivitet thanë se paratë që qarkullojnë në të zezë mund të formalizohen duke sjellë më shumë fonde në buxhet që mund të përdoren për investime në sport. Më me pathos, argumentin e parashtroi Fidel Ylli, Kreu i Komiteti Olimpik.
Rama ra dakord: “Në aspektin buxhetor kjo është një ndërhyrje e arsyeshme që sjell një shumë jo të vogël”, tha ai.
Një tjetër argument i parashtruar, ishte se bastet sportive janë legale dhe në vendet më të zhvilluara.
“Kemi parë që bastet sportive luhen në të gjithë botën. Ato që luhen, le të luhen në mënyrë të ligjshme. Është një burim financimi për sportin. Mund të jetë një mënyrë që mund të bëjmë për sportin”, tha kreu i FSHF-së, Armand Duka.
Më tej, Rama shpjegoi se nëse vendoset hapja e basteve sportive, nuk do jetë i njëjti format si më parë, por do të legalizohet veprimtaria vetëm online.
