Ministri i Brendshëm, Bledi Çuçi njoftoi këtë të Mërkurë shkarkimin e Gledis Nanos nga drejtimi i Policisë së Shtetit.
“Sot qeveria mori vendim për shkarkimin e Drejtorit të Përgjithshëm të Policisë, Gledis Nano, tha ministri Çuçi pas mbledhjes së Këshillit të Ministrave. Arsyeja e shkarkimit që përmendi ishte “mospërmbushja e objektivave”.
“Shkarkimi lidhet me mos-përmbushjen e objektivave që i ishin caktuar Drejtorit të Përgjithshëm dhe kryesisht me situatën e muajve të fundit, që kërkon një reagim më të fortë dhe menaxhim më efikas të Policisë së Shtetit”, u shpreh ministri Çuçi.
“Për momentin, detyrat e Drejtorit të Përgjithshëm të Policisë do i ushtrojë nën-Drejtori i Përgjithshëm i Policisë dhe shumë shpejt besoj që do t’ju lajmërojmë për emrin e ri”, tha Çuçi.
Pas njoftoi largimin e Gledis Nanos, që u paralajmërua nga mediat dy ditë më parë, ministri u pyet nga gazetarët.
Zoti ministër kur shkruat dje në FB 0 tolerancë ndaj krimit a i kishin parasysh a i kishin në konsideratë shumë ngjarje të rënda kriminale të pazbardhura, shumë policë që nuk gjejnë autorë që bëhen autorë apo përkrahin autorë të krimit dhe një mashtrim publik të Policisë që tha që për ngjarjen e Potamit shkarkoi zinxhirin përgjegjës, por në fakt i pezulloi dhe pak më parë i shpërndau sërish në detyra. Mendoni që zëvendësimi i një emri do të zgjidhë këtë panoramë që ju parashtrova, por ju e dini?
“Sigurisht puna do jetë e gjithanshme, por këto që përmendët ju kanë qenë edhe një nga arsyet kryesore që policia e shtetit dhe drejtuesi kryesor i Policisë së Shtetit kërkon një reagim më të fortë ndaj këtyre fenomeneve dhe një menaxhim më efikas”, tha Çuçi.
Zoti ministër kur ju flisni për përgjegjësi që ka tashmë drejtori i shkarkuar Gledis Nano, po ju vetë si ministër nuk keni përgjegjësi për aq kohë sa policia është në varësi të ministrisë suaj? Ngjarjet e pazbardhura të krimit nuk lidhet vetëm me Drejtorin e Policisë, por edhe me punën e ministrisë.
“Pa diskutim ka shkallë përgjegjësie deri tani Këshilli i Ministrave, qeveria ka menduar që ndryshimi i menaxhimit përmes shkarkimit të Drejtorit të Përgjithshëm të Policisë është besoj unë një masë efikase për të pasur një reagim më të fortë në luftën kundër krimit”, u përgjigj Çuçi.
