Gjykata e Laçit, ka vendosur të caktojë masën e sigurisë “arrest në burg” për Met Likën, i cili në 23 Gusht ka qëlluar me armë në drejtim të bashkëfshatarit tij, Rasim Tafa, duke e lënë të plagosur rëndë.
Tentativa e vrasjes ndodhi në fshatin Gjormë të Kurbinit, ku 41-vjeçari Met Lika, qëlloi me armë zjarri Rasim Tafën, pasi lopa e këtij të fundit kishte hyrë në pronës e Likës.
Sherri ka nisur pikërisht për lopën, çka solli goditjen fizike dhe më pas përdorimin e armëve, duke çuar në plagosjen e rëndë të 53-vjeçarit Tafa.
Ndaj Met Likës, prokuroria e Kurbinit ka regjistruar një procedim penal për akuzën e “Vrasjes me dashje” mbetur në tentativë dhe “Mbajtjes pa lejë të armëve të zjarrit”.
Gjatë seancës gjyqësore Lika, ka deklaruar se gjithçka ka ndodhur në gjaknxehtësi e sipër, duke shfaqur pendesë për krimin e kryer. 41-vjeçari Lika ka kërkuar mëshirë nga gjykata, të cilës i kërkoi një masë më të butë sigurimi.
Por trupi gjykues pranoi kërkesën e prokurorit Arben Nika, duke vendosur mbylljen në burg të 41-vjeçarit, deri në sqarimin me plotë të rrethanave të kësaj ngjarje.
