Një 32-vjeçar shqiptar u arrestua në Brunico të Bolzanos në Itali, në bazë të një urdhër-arresti europian. Ai akuzohet për një vrasje të kryer në Greqi në korrik të vitit 2010.
Mediat italiane shkruajnë se 32-vjeçari me inicialet S.P ndodhet në burg në Bolzano që nga mbrëmja e së mërkurës.
Ai akuzohet se ka kryer një vrasje në korrik të vitit 2010 gjatë një vjedhjeje në Greqi. “Ne nuk dimë asgjë për rrethanat e krimit për të cilin akuzohet klienti ynë,” thotë avokati Marco Dall’Aglio, i cili mbron të arrestuarin së bashku me Nicola Nettis.
Avokati i shqiptarit ka deklaruar se klienti i tij është shokuar në momentin e arrestimit. Ai shtoi se 32-vjeçari nuk dinte asgjë për faktin se kishte një hetim për të në Greqi. Edhe avokatët e tij nuk kanë mundur të flasin me shqiptarin, por të afërmit kanë thënë se ai nuk mund të ketë lidhje me vrasjen në shtetin grek.
Një nga avokatët tha se shqiptari në 2010 ishte student universiteti në Shqipëri. “Qëndrimi i tij i vetëm në Greqi daton në një udhëtim shkollor kur ishte 13 vjeç”, tha avokati Dall’Aglio. Ai shtoi se e gjitha mund të jetë edhe një gabim drejtësie dhe mund të jetë ngatërruar person.
Tashmë avokatët mbrojtës po përpiqen të marrin informacione të mëtejshme për vrasjen e dyshuar në Greqi, pasi në shtator do të zhvillohet seanca dëgjimore në Gjykatën e Lartë Rajonale për ankesën kundër ekstradimit në Greqi, e cila do të depozitohet së shpejti.
Avokatët do të përpiqen të bindin gjykatën se klienti i tyre nuk ka qenë në Greqi në korrik të vitit 2010, që ai të mos ekstradohet në shtetin helen.
