Nga Boldnews.al
Pak javë më parë, BoldNews.al publikoi një investigim për një shpenzim të kotë nga Pirro Vengu, Drejtori i Autoritetit Portual të Durrësit, i cili hapi një tender 1.3 milionë euro për zgjerimin e portit. Disa javë pas shpalljes së këtij tenderi, qeveria njoftoi se po dorëzon në Parlament draftin e kontratës me arabët, ndërsa janë dakortësuar edhe përqindja që i takon ndërtuesve dhe përqindja e shtetit. Por, Vengu po shpenzon dhjetëra miliona euro për kontrata të kota, që nga pastrami 3-vjeçar, te pajisjet elektronike apo mekanike si edhe vinçat që i jepen firmës që ka marrë me qira Terminalin e Kontenierëve.
Por, si për çudi të të gjithëve, Ministria e Bujqësisë, e drejtuar nga Frida Krifca, ka hapur një tjetër tender që prek Portin e Durrësit. Sipas dokumenteve që disponon BoldNews.al, Krifca ka akorduar plot 1.6 milionë euro për Portin e Peshkimit, që ndodhet brenda Portit të Durrësit, në anën veriore. Por, zonjë apo zonjushë Krifca, a nuk iu dha arabëve ky port?!
Faksimile: Tenderi i shpallur nga Ministria e Bujqësisë për rregullimin e Portit të Peshimit brenda Portit të Durrësit
Sipas dokumenteve që disponon BoldNews.al, Ministria e Bujqësisë ka haur procedurën me objekt “shtimi i kapaciteteve ankoruese në Portin e Peshkimit Durrës (bankinë) loti 1”. Në të njëjtin dokument shkruhet se fondi është 165.850.612 lekë pa TVSH, ose me TVSH rreth 1.6 milionë euro, ndërsa “kohëzgjatja e kontratës/marrëveshjes kuadër ose afati për zbatimin e saj është brenda 6 muajve nga fillimi i punimeve”.
Mësohet se ofertat janë hapur në fund të muajit korrik 2022, teksa këto ditë pritet të shpallet edhe fituesi. Por, ajo ç’ka është e dyshimtë në gjithë këtë procedurë ka të bëjë me shpejtësinë e bërjes së këtij tenderi. Apo më saktë, në kohën që po zhvillohet, pasi në këto javë janë bërë konsultime me arabët për pjesën takuese.
Madje, qeveria, ku është pjesë edhe Frida, ka deklaruar se ka rënë dakort për përqindjen. Por, ministrja bionde ka vijuar procedurat, teksa ka akorduar një shumë të majme. Dy janë mundësitë; ose projekti 2 mld do të dështojë, ose Frida do të ndihmojë arabët duke i bërë bankinat!
Faksimile: Projekti i arabëve prek edhe Portin e Peshkimit, për të cilin u akorduan 1.6 milionë euro
Sipas projekteve të paraqitura, projekti 2 mld euro do të prekë të gjithë territorin egzistues të Portit të Durrësit, që nga ana jugore e deri në anën veriore. Madje, të gjitha terminalet apo edhe vetë Portin e Peshkimit. Është parashikuar që Porti i Mallrave (kontenierëve) të zhvendoset drejt Porto Romanos, ndërsa në atë territor do të ndërtohen hotele apo qendra tregtare.
Por, a ka parë lajmet apo ka dëgjuar kolegët e saj Frida se ai territor do t’i kalojë arabëve? Shikoni pak me vëmendje projektin 2 miliardësh. Ai prek edhe Portin e Peshkimit, në gjendjen që është aktualisht, por do të ketë ndërtime. Ndërkohë, hidhini sytë te dokumentet e Fridës. Janë foto të marra në dokumentet e tenderit. Është i njëjti territor që do t’i jepet arabëve. Pra, 1.6 milionë euro të hedhur në “kosh”. Ose, mund të shkojnë për klientët e qeverisë.
