Nga Boldnews.al
Historia e skandaleve qindra-mijëra euro me tenderat e zhvilluar nga institucionet shtetërore, për fat të keq, tashmë ka marrë trajtat e një situate rutinore, ku shkeljet janë të përditshme, ndërkohë që reagimi i institucioneve ligjzbatuese është afërisht Zero.
Në morinë e institucioneve problematike me tenderat, Operatori i Sistemit të Transmetimit (OST) nën drejtimin e Skerdi Drenovës ka një vend “nderi”, për shpeshtësinë e tenderave abuzive.
Kontrolli i Lartë i Shtetit, në një raport të përfunduar në Maj të këtij viti, ka identifikuar disa procedura tenderuese të kryera në kundërshtim me ligjin.
“Boldnews.al” ka veçuar njërin prej tyre. Ndoshta jo më i shtrenjti, por me shkeljen më flagrante, sipas konstatimeve të KLSH-së.
Në 26 Shkurt 2020, vetëm pak ditë pasi Skerdi Drenova ishte emëruar në krye të Operatorit të Sistemit të Transmetimit, institucioni shpall tenderin “Përditësimi i moduleve, topologjisë dhe analizave për aplikacionet e rrjetit EMS”, me fond limit 178 milionë lekë të vjetra.
Në tender merr pjesë vetëm një operator ekonomik, i cili shpallet edhe fitues.
Kompania është “Start & Co”, e cila zotërohet 50 përqind nga Anila Qendro, bashkëshortja e prefektit aktual të Tiranës, Afrim Qendro.
Zyrtari Qendro është një prej njerëzve më të promovuar nga kryeministri Edi Rama.
Ai ishte drejtues i Autoritetit Rrugor Shqiptar, kur shpërtheu skandali i “Unazës së Re”.
Një kompani fantazmë, “DH-Albania” fitoi tenderin mbi 20 milionë euro për ndërtimin e lotit të dytë të segmentit “Pallati me Shigjeta-Sheshi Shqiponja”, në Tiranë.
Pas shpërthimit të skandalit, Rama u detyrua ta largojë Qendron nga ARRSH dhe përkohësisht e vendosi si dublues të kryetarit të Bashkisë së Vlorës, Dritan Leli, pasi ky i fundit nuk po i bindej më liderit të tij politik.
Paralelisht me karrierën e tij institucionale, edhe kompania e familjes së Qendros vijon aktivitetin e saj me progresion rritës në fitimin e tenderave publikë.
Një prej këtyre procedurave të përfituara nga ‘Start & Co” është edhe tenderin rreth 150 mijë euro i Skerdit të OST-së për aplikacionet EMS.
Sipas Kontrollit të Lartë të Shtetit, institucioni i drejtuar nga Skerdi Drenova ka kryer shkelje të rënda, duke shpallur fitues kompaninë e familjes së Afrim Qendros.
Audituesit shtetërore konstatojnë se “…. pavarësisht se është oferta e vetme ekonomike, rezulton se Operatori Ekonomik “Start & Co” nuk ka plotësuar të gjitha kriteret e DST, duke u kualifikuar dhe shpallur fitues me pa të drejtë nga ana e Komisionit të Vlerësimit të Ofertave”.
Sipas Kontrollit të Lartë të Shtetit, “kompania fituese, për të plotësuar kriterin e punëve të ngjashme, ka paraqitur tre fatura të njëjta, duke trefishua artificialisht vlerën totale të shërbimit. Pra në këto kushte KVO nuk duhej ta kualifikonte OE “S.C.”
Pas këtyre konstatimeve, KLSH deklaron se Operatori i Sistemit të Transmetimit duhet të anulonte procedurën, për shkak se operatori i vetëm në garë nuk plotësonte kriteret e parashikuara.
Por, ndryshe nga sa ka shprehur Kontrolli i Lartë i Shtetit, institucioni i Skerdi Drenovës ka nënshkruar kontratën me kompaninë “Start & Co”, duke fuqizuar portofolin e familjes së prefektit të Tiranës, Afrim Qendro.
