Nga Boldnews.al
Nëse tre të rinjtë ruso-ukrainas që u përfshinë në incident fizik me dy roje të Uzinës Ushtarake në Gramsh këtë të shtunë janë vërtetë “celulë spiunazhi”, atëherë duhet të pranojmë se është krijuar një mit i rremë për efikasitetin dhe fshehtësinë e tyre.
Autoritetet shqiptare kanë ngritur dyshimet të forta se rusët Mikhail Zorin e Svetlana Timofoeva nga Rusia, të moshës 24 dhe 33 vjeç dhe një ukrainas 25-vjeçar i identifikuar me inicialet F.A., gjendeshin në Uzinën ushtarake për të fotografuar një objekt të rëndësisë së veçantë.
Nga ana tjetër, tre të dyshuarit kanë deklaruar se janë blogerë dhe kanë hobi fotografimin e objekteve të vjetra dhe të braktisura ushtarake të periudhës sovjetike.
Natyrisht, në këto momente të para është e vështirë të thuhet me saktësi se cili është versioni i saktë i ngjarjes-spiunazh apo aventurë të rinjsh.
Nëse pranohet varianti i spiunazhit, atëherë “celula” ruso-ukrainase ka qenë më së paku e paaftë.
Ata nuk kanë pasur aspak kujdes për të vepruar në fshehtësi.
Sipas variantit zyrtar të autoriteteve shqiptare, një prej të rinjve rus, Mikhail Zorin, është pikasur duke kryer fotografi në Uzinën Ushtarake të Gramshit rreth orës 17.40 të së Shtunës së 20 Gushtit, kohë kur drita e diellit është e fortë dhe çdo lëvizje dallohet lehtësisht.
Ata kanë udhëtuar me një mjet Chevrolet sportiv, i cili dallohet lehtësisht kur lëviz, sidomos në pjesën rurale të Gramshit.
Mjeti ka targa ukrainase, një gjë që nuk haset shpesh jo vetëm në Gramsh, por edhe në të gjithë Shqipërinë.
Pra, nëse “celula” ka pasur qëllim spiunazhi në objektin ushtarak në Shqipëri, ajo ka qenë tërësisht e paaftë për të mbuluar veprimet e saj subversive.
Aq më tepër që fotot e tyre, “celula” i bën publike në një blog në internet, ku kanë postuar edhe pamje nga baza e Pasha-Limanit, në Vlorë, të shkrepura një vit më parë.
Megjithatë, është e vërtetë që një incident ka pasur. Rojet ushtarake, Aldo Bici dhe Ardian Caka, në tentativë për të larguar rusin Zorin nga baza ushtarake, janë qëlluar në sy me spraj neuro-paralizues.
Fatmirësisht, gjendja shëndetësore e dy ushtarakëve është e mirë dhe ata nuk kanë asnjë pasojë të rëndë, siç njoftoi Ministria e Shëndetësisë.
Ende nuk dihet se çfarë ka deklaruar rusi Zorin për incidentin dhe për goditjen e dy ushtarëve, pasi ai dhe dy të tjerët u shoqëruan nga Policia, gjatë orëve të pasdites së të Shtunës.
Hetimet, për momentin, po zhvillohen nga Prokuroria e Elbasanit, e cila po mbështetet nga zyrtarët e lartë të Drejtorisë së Përgjithshme të Policisë, si edhe të Strukturave të Inteligjencës Ushtarake e të Shtetit.
Autoritetet deklarojnë se kanë dërguar për ekspertizë aparatin fotografik, me të cilin janë kryer fotot në Uzinën Ushtarake në Gramsh, për të hedhur dritë më shumë mbi këtë incident, që për momentin po vlerësohet si “spiunazh ndërkombëtar” ose edhe “spiunazh gjeopolitik”, siç e konsideroi Ministri i Mbrojtjes, Niko Peleshi, në një deklaratë mediatike dhënë paraditen e së Dielës.
Pas pushtimit të Ukrainës nga Rusia, vendet anëtare të NATO-s, përfshirë edhe Shqipërinë, kanë ngritur nivelin e gatishmërisë për të shmangur ndërhyrje apo spiunazhin rus në radhët e forcave të tyre ushtarake.
Vendi ynë është anëtari më i varfër i Aleancës së Atlantikut dhe nuk është i pajisur me teknologji ushtarake të përparuar, e cila mund të tërheqë interesin e forcave jashtë NATO-s për të kryer veprimtari subversive.
Po ashtu, rrjedhja e informacioneve konfidenciale të të gjithë shtetasve shqiptarë vitin e kaluar apo edhe sulmi kibernetik që gjeti tërësisht të papërgatitura sistemin informatik të të gjithë aparatit shtetëror në verën e këtij viti, e vendos Shqipërinë përballë detyrimit që duhet të forcojë shumë herë më tepër mekanizmat e saj mbrojtës, për t’u bërë i besueshëm dhe i sigurt, sipas standarteve të Aleancës së Atlantikut Verior.
