Vorskla Poltava i ka vënë në tavolinë Tiranës Taulant Seferin. Bardheblutë duhet të vendosin nëse do të shesin yllin e tyre të skuadrës apo do të shohin diçka tjetër.
Vorskla Poltava, ka bërë një ofertë që mendohet se është prej 500 mijë eurosh për kartonin e tij, por edhe një rrogë të majme.
Autori i 19 golave sezonin që shkoi është duke medituar për ofertën ashtu si dhe drejtuesit e klubit, të cilët duhet të vendosin deri në fund të javës.
E sigurt është që Seferi nuk llogaritet si pjesë e Tiranës në këtë sezon, veç përmbysjes së situatës. Po kështu, Tirana pret të bëjë edhe dy goditje.
Një është mbrojtësi i djathtë, Albion Marku, për të cilin gjërat duken pothuajse të mbyllura. Për lojtarin ka derbi me Partizanin, pasi edhe të kuqtë po e kërkojnë.
Ndërkohë, në fund mund të afrohet edhe një futbollist tjetër për të plotësuar bardheblutë. Kujtojmë që në Europë, Tirana koleksionoi 4 humbje rresht.
