Drejtuesi i Partisë së Lirisë, Ilir Meta, nga qyteti i Vlorës, tha se kjo gjendje që po kalon vendi është pasojë e korruptimit të opozitës dhe kapjes së drejtësisë nga Edi Rama.
Gjatë takimit me strukturat e PL në Vlorë, Meta tha se drejtësia sot nuk funksionon sepse e ka kapur Edi Rama.
“Si e kapi Edi Rama drejtësinë? E kapi sepse kishim një opozitë të korruptuar, që braktisi fushën e lojës dhe i la Edi Ramës të gjitha pushtetet. E dini ju se çfarë ndodh sot me Bashkitë, jo në Vlorë por edhe në Tiranë? S´ka opozita asnjë këshilltar. Ndaj kjo situatë sot është pasojë e korruptimit të opozitës”, tha Meta.
Ai duke iu drejtuar të pranishmëve u shpreh se “mos prisni që zgjidhja të vijë nga Italia apo Gjermania, pasi ato kanë hallet e tyre. Zgjidhja do të vijë sepse do të ngrihet populli dhe kur ngrihet populli edhe ndërkombëtarët thonë jemi me popullin”, tha Meta. Ai shtoi se na duhet së pari që populli duhet të ngrihet, ndaj dhe ne do të punojmë në këtë drejtim.
“Ky regjim luftohet me anti-korrupsion. Zbardhja e aferës së inceneratorëve do të sjellë ndryshime të paimagjinueshme dhe shumë të shpejta. Edhe Bota e ka kuptuar se çfarë sharlatani kemi ne për Kryeministër. Europa sot është e shqetësuar sepse problemet më të mëdha që kanë shkaktohen nga krimi i organizuar”, tha Meta.
Madje ai shtoi se edhe vizat nuk i liberalizohen Kosovës për shkak të krimit të organizuar. “Të jeni të bindur se edhe hapja e negociatave erdhi për shkak të Ukrainës, por negociatat me këtë qeveri nuk do të ndodhin, për shkak të krimit”, tha Meta.
Ai tha se Edi Rama në panik, ndaj dhe paralajmëron miratimin e ligjeve jo me sekretar partie, e me budalliqe të tjera. “Edi Ramës i mbaroi skema e blerjes së opozitës apo aktrimeve me opozitën”, shtoi ai.
