Në takimin me strukturat në Vlorë, kryetari i Partisë së Lirisë, Ilir Meta theksoi rëndësinë e thithjes të sa më shumë qytetarëve për të nisur protestat kundër qeverisë.
Meta u shpreh se bota e ka njohur tashmë se sa sharlatan është kryeministri Edi Rama dhe ka paralajmëruar se shumë shpejt gjërat do të ndryshojnë duke shtuar se zbardhja e aferës së inceneratorëve do të sjellë tronditje shumë të mëdha.
“Kur ngrihet populli të gjithë thonë jemi me popullin. Askush nuk rri pa gjumë për fëmijët tanë. Është detyra jonë të ngremë popullin dhe kjo do të ndodhë. Kur bëra thirrjen për 2 marsin kisha besim të plotë se njerëzit do të vinin. Ishte ligji për betimin e gjykatës kushtetutese për betimin te Lana te noterët privatë. Dhe kam një besim shumë të madh se gjërat do të ndryshojnë shumë më shpejt se sa besojnë edhe shumë prej jush këtu.
Na duhet njerëz me shumë karakter në këtë betejë. Ky sistem luftohet me anti-korrupsion. Prandaj edhe zbardhja e aferës së inceneratorëve do të sjellë tronditje shumë të mëdha shumë shpejt dhe do të ketë ndryshime të paparashikueshme për secilin që ka parasysh se çfarë ka ndodhur në këto 9 vite. Edhe bota e ka kuptuar se çfarë sharlatani është ky që kemi për kryeministër.
Problemet më të mëdha që kanë ata në Europë vijnë nga krimi i organizuar shqiptar. Edhe çështjen e vizave të Kosovës që nuk ia japin kjo është. Për shkak të kriminalitetit shumë të lartë të grupeve shqiptare në Kosovë. Dhe hapja e negociatave ishte se ata morën një vendim për shkak të Ukrainës. Ata nuk kanë për të filluar asnjëherë realisht me këtë qeveri. Ka shumë çështje që kanë mbetur pezull. Zhvillimet do të jenë të forta dhe të shpejta.
Duhet të jemi të përgatitur për të mbajtur peshën e duhur. Paniku nga ana e tyre është i qartë përderisa shpikin budalliqe. Nuk e dinin këta se Saliu kishte qenë sekretar partie para vitit 90. Tani e zbuluan këta dhe do bëjnë ligje. Këto janë të gjithë tregues të panikut. I dini ju këto punë se i keni provuar edhe në kurrizin tuaj këtu në Vlorë. Më hapët dhe një parrullë ju mua. Flasim pastaj. Ju kishte dehur Luli juve dhe kujtonit ju se do dehesha dhe unë”, tha Meta.
Ish-Prsidenti u shpreh se ‘çështja e detit me Greqinë’ do të rikthehet sërish në shtator ndërsa shtoi se Rama qëndron në krah të palës greke për interesat e tij.
“Ballkani i Hapur është një nismë anti-europiane. Shikoni si e ka menaxhuar çështjen e detit me Greqinë. Kjo është një çështje tjetër që do hapet prapë në shtator. Është bërë si avokati i palës tjetër. Këtë e bën jo për të rregulluar marrëdhëniet me Greqinë por i interesojnë marrëveshjet që ka bërë për naftën dhe gazin atje.
Ka shumë akte të rënda. Të gjitha këto kanë ndodhur sepse nuk ka pasur opozitë. Opozita ishte e korruptuar. Lulzim Basha ishte i blerë. Kjo solli edhe djegien e mandative. Prandaj nuk funksionon sot drejtësia. Shikoni aferën e inceneratorëve çfarë katastrofe është.
Turp të keni ju që keni djegur mandatet. Unë nuk e kam djegur mandatin tim. Porosia ime është, të shkruar e ka ish kryetarja juaj dhe zoti Petrit Vasili. U thashë në asnjë mënyrë se është një kurth. Unë nuk e lëshova zyrën time sepse ishte vënë dora mbi kushtetutë. Është momenti që të tregojmë që jemi shqiptarë”, tha Meta.
